اسلام آباد۔ 24 نومبر (اے پی پی) صدر مملکت ڈاکٹر عارف علوی تینا اُرائی بیگم ثیمنہ علوی تون اوار چناتا پسندیدہ پیل‘‘کاون’’ نا کمبوڈیاروانگی نا بابت سپاروکی دود اٹی بشخ ہلکونے۔ اودا بابت خصوصی دود اٹی بشخ ہلنگ کن مرغزار چڑیاگھر نا دورہ ءِ کرے۔ داوخت آ وزیر مملکت موسمیاتی بدلی زرتاج گل، وزیراعظم نا خصوصی کمکار موسمیاتی بدلی امین اسلم و ساہدار تا رکھ انا تنظیم فور پاز انا کمامدارآک ساڑی ئسر۔ داوخت آ ساہدار تا رکھ انا تنظیم فور پاز انا ڈائریکٹر ڈاکٹر عامر خلیل کاون پیل انا کمبوڈیا غا گدریفنگ و خیالداری کن بست و بند آتا بابت حوال تس۔ صدر مملکت ڈاکٹر عارف علوی گپ وتران کرسا پارے کہ چیف جسٹس اسلام آباد ہائی کورٹ اطہر من اللہ اسلامی روایت آتا رداٹ ساہدار تا رکھ و اوفتے سازگار چاگڑد اس فراوان کننگ نا بابت شاندار ءُ فیصلہ اس کرینے۔ اوپارے کہ چنکی ٹی ساہدار تا چناتے اوفتا لمہ غاتیان جتا کننگ آن اوفتا احساس آتیا منفی زہم تمک۔ صدر اومیت ظاہر کرے کہ کاون پیل کمبوڈیا ٹی تینا ایلو سنگت آتون اواری اٹ خوشی محسوس کیک۔ صدر مملکت دابابت وزارت موسمیاتی بدلی نا کوشست آتا ستاءِ کرے و پارے کہ ساف شفاف پاکستان تحریک نا رداٹ مارگلہ نیشنل پارک ءِ رکھ کننگ کن گام گیج کننگے۔ اوالس اٹ ساہدار تا حق و اوفتا خیالداری کن سازگار چاگڑد اس فراوانی نا بابت آگاہی ودی کننگ آ زور شاغا۔ اومارگلہ ہلز انا ساہدار تا رکھ و اسلام آباد ہائی کورٹ نا فیصلہ غا عمل کرسا مرغزار چڑیاگھر نا ساہدار تا ایلوجاگہ غا گدریفنگ ناعمل آ اسلام آباد وائلڈ لائف مینجمنٹ بورڈ انا خذمت آتا ستاءِ کرے۔ صدر مملکت ساہدار تیا ظلم انا توننگ نا کانود 1890 آ عملدرآمد آ زور شاغا ہراٹی ساہدار تا رکھ انا بابت گچین بنداو فراوان کننگانے۔ اواسلام آباد نا چنا و شاری تیکن اسلام آباد زو انا دُوارہ جوڑ کننگ نا عمل اٹ ترندی اتنگ آ زورشاغا۔ 35 سال آن اسلام آباد اٹی رہینگوک آ کاون پیل ءِ جوان دیکھ بھال و قدرتی چاگڑد نا فراوانی نا رداٹ اسلام آباد ہائی کورٹ نا پرمان آ کمبوڈیا نا جنگلی حیات آتا مسکن اٹ گدریفنگک۔چناو بھلا تیٹی اسہ وڑ پنی کاون پیل 1985ء ٹی سری لنکا ٹی ودی مس۔ سری لنکا نا حکومت دادے تحفظہ ٹی صدر پاکستان ءِ تس۔ 1990 ٹی اسہ پیل ساہلی ءِ بنگلہ دیش آن اتنگا ہراکہ 2012ء اسکان تینا مرک اسکان کاون تون اوار مس۔ ساہدار تاحق انا سرگرم کارندہ غاک کاون نا آجوئی کن مہم اس چلیفیر تانکہ اونا جوان وڑاٹ خیالداری ءِ کننگ مرے۔
