اسلام آباد۔ 24 نومبر (اے پی پی) پاکستان سعودی عرب نا شار جدہ ٹی واقع پٹرولیم ڈسٹریبیوشن ٹرمینل آ حوثی عسکریت پسند آتا میزائل جلہو نا ترند انگا لوز آتیٹی مذمت ءِ کرینے و سعودی عرب نا علاقائی سالمیت و سوگوی نا برخلاف داوڑنا واقعہ غاتا دمدستی چٹفنگ آ زور شاغانے۔ دفترخارجہ سے شنبے نادے آ حوثی عسکریت پسند آتا جدہ ٹی جلہو نا مذمت ءِ کرسا پارینے کہ نن سعودی عرب نا سلامتی و علاقائی سالمیت ءِ لاحق خطرہ غاتا برخلاف برادر مملکت تون تینا پورو مخ تفی و یکجہتی نا درشانی ءِ کینہ۔دفترخارجہ پارے کہ دا جلہو آن ایندھن نا ٹینک اٹ خاخر لگا، ہرادے بیدس جانی نسخان نا سرسہبی اٹ کسفنگا، جلہو سعودی عرب نا وتواجہی نا برخلاف کارروائی ءِ، ہراڑآن بے گناہ شاری تا جان تے خطرہ مون تروک ءِ۔
