جنیوا۔ 24 نومبر (اے پی پی) جہانی ادارہ جان جوڑی پارینے کہ امریکی صدر ڈونلڈ ٹرمپ کورونا دین انا تنکی ءِ سیاسی رنگ اس تننگ آن پاناد کے۔ جہانی ادارہ جان جوڑی ڈونلڈ ٹرمپ انا کنڈآن جہانی ادارہ جان جوڑی آ چین نا طرفداری و تعصب کننگ نا دوبہ و امداد ءِ بند کننگ نا دھڑکوتیان پد اودے تنقید نا نشانہ کرینے۔ جہانی ادارہ جان جوڑی نا ڈائریکٹر جنرل ٹیڈروس اڈھانوم گیبریوس امریکی صدر نا بیان نا ورندی ٹی مسہ ٹکی ردعمل اس جاری کرینے۔ اوپارے کہ کورونا تنکی نا برخلاف قومی و جہانی کہول آ غٹ ملک آتے یکجا مروئی مریک۔ کوویڈ۔ 19 نا تنکی ءِ سیاسی رنگ اس تننگ آن پاناد کروئی مریک و دا جہانی دین انا برخلاف مخلصانہ یکجہتی نا درشانی ءِ کروئی مریک۔ اوپارے کہ جہانی راہشونک خاص وڑاٹ چین و امریکہ ءِ شفافیت نا درشانی ءِ کروئی مریک و اسہ ملک اسے کن ہم دا جوان اف کہ او کورونا دین ءِ سیاسی رنگ اس تننگ نا کوشست کے۔ یات سلے کہ تدوک آ سے شنبے آ وائٹ ہاؤس اٹی اسہ پریس کانفرنس اسے ٹی امریکی صدر ڈونلڈ ٹرمپ جہانی ادارہ جان جوڑی آ چین نا طرفداری ءِ کننگ و تعصب کننگ نا دوبہ خلسا دھڑکو تسوسس او ڈبلیو ایچ او ءِ تروک آ امداد ءِ توننگ کیک۔
