اسلام آباد۔ 23 نومبر (اے پی پی) بنجائی وزیر ڈٹ بندی اسدعمر نا کماشی ٹی این سی او سی نا دیوان اس اڈ ہلک ہراٹی ملک اٹی کورونا نا دین انا حالیت آتا جاچ ءِ ہلنگا۔ دیوان اٹی بنجائی وزیر تعلیم شفقت محمود و صوبائی نمائندہ غاک بذریعہ ویڈیو لنک بشخ ہلکر۔ دیوان اٹی پاننگاکہ اینو مچ آ ملک اٹی کورونا کیس آتا کچ غٹ آن زیات 7.46 درسد ئس۔ دیوان اٹی داہم پاننگاکہ آزاد جموں و کشمیر اٹی 11.45، بلوچستان اٹی 7.73، گلگت بلتستان اٹی 5.23، اسلام آباد اٹی 8.09، خیبرپختونخوا ٹی 9.85، پنجاب اٹی 3.95وخت اس کہ سندھ اٹی کورونا کیس آتا کچ 9.63درسد ءِ۔ پنجاب اٹی غٹ آن زیات کیس راولپنڈٛی، ملتان ، لاہور و فیصل آباد اٹی مون آ بسنے۔ سندھ اٹی زیات کیس کراچ و حیدر آباد وخت اس کہ خیبرپختونخوا ٹی پشاور، ایبٹ آباد و سوات اٹی کورونا کیس آتا زیات کچ مون آ بسنے۔ آزاد جموں و کشمیر اٹی میر پور وخت اس کہ گلگت و اسلام آباد اٹی ہم کیس آتا کچ ودنگ ءِ۔ این سی اوسی دیوان اٹی بشخ ہلوک آتے داہیت آن ہم معلومدار کننگاکہ داوخت آ مچ آ ملک انا ہسپتال آتیٹی 2155ناجوڑ داخل ءُ۔ تدوک آ اِراہفتہ ٹی بے کچ نازرک کیس آتا کچ اِراہنداخہ ودانے۔ تدوک آ اسہ ہفتہ ٹی کورونا دین انا سوب آن 35 بندغ تینا جان تیان دوتے سلار۔ دیوان اٹی داہیت ہم مون آ بس کہ کورونا کیس آتا غٹ آن زیات کچ تعلیمی ادارہ غاتیٹی مون آ بس، کل کورونا کیس آتیان 19 درسد کیس تعلیمی ادارہ غاتیٹی رپورٹ مس۔ اسہ ہفتہ ٹی تعلیمی ادارہ غاتیٹی پازیٹو کیس آتا کچ 1.8 درسد آن ودسا 3.3 درسد مسنے ہرا جم وڑاٹ 82 درسد ودکی مسنے۔
