اسلام آباد۔ 23 نومبر (اے پی پی) بنجائی وزیر تعلیم و کسبی تربیت شفقت محمود پارینے کہ ملک اٹی ودوک ا کورونا کیس آتا سوب آن تعلیمی ادارہ غاک 26 نومبر آن 24 دسمبر اسکان بند مریرہ وخت اس کہ 25 دسمبر آن 10 جنوری اسکان سیڷ انا چھٹیک مریرہ، داٹی داوخت آ ہروڑنا تعلیمی امتحان آک ہراکہ شیڈول ئسر مفسہ، ولے ووکیشنل سینٹر آک ملوک مریرہ و انٹری ٹیسٹ و ملازمت آتین امتحان آتا موکل مریک۔ یونیورسٹی و غٹ تعلیمی ادارہ غاک آن لائن تعلیم ایترہ، یونیورسٹی ہاسٹل آتیٹی اسہ تہائی طالب علم آتے رہینگ انگ نا موکل مریک۔ دوشنبے نادے آ داہیت انا فیصلہ ءِ بنجائی وزیر تعلیم شفقت محمود نا کماشی ٹی بین الصوبائی وزرائے تعلیم نا این سی اوسی ٹی مروک آ دیوان اٹی کننگا۔ دیوان آن پد وزیراعظم نا خصوصی کمکار قومی جان جوڑی ڈاکٹر فیصل سلطان تون اوار شفقت محمود سرجم آتیان معلومدار کرسا پارے کہ غٹ تعلیمی ادارہ غاک ہرافتے ٹی اسکول، یونیورسٹی، ٹیوشن سینٹر 26 نومبر آن 24 دسمبر اسکان بند کننگ نا فیصلہ ءِ کننگانے وخت اس کہ 25 دسمبر آن 10 جنوری اسکان سیڷ انا چھٹیک مریرہ۔ اوپارے کہ تعلیمی ادارہ غاک 11جنوری آن دُوارہ تینا تعلیمی سرجزغاتا بناءِ کیرہ وخت اس کہ داکان مست جنوری نا اولیکو ہفتہ ٹی کورونا نا حالیت آتا جاچ ءِ ہلنگ کن اسہ جاچ دیوان اس مریک ہراٹی ہمووخت انا حالیت آتیا سجفنگک۔ شفقت محمود پارے کہ دسمبر اٹی ہراکہ امتحان تے مروئی ئسک اوفتے پد بٹنگانے ولے انٹری ٹیسٹ و ملازمت آتیکن مروک آ امتحان تا موکل مریک۔ اوپارے کہ یونیورسٹی تیٹی دمدستی وڑاٹ آن لائن تعلیمی سرجز آتا بناءِ کننگک۔ یونیورسٹی ہاسٹل اٹی اسہ تہائی طالب علم آتے رہینگ نا موکل مریک ہراٹی او ہموطالب علم آک ہرامُر مُر انگا علاقہ غاتیان ءُ ہراڑے انٹرنیٹ نا آسراتی میسر اف و درملکی طالب علم آک اوار مریرہ۔ ہاسٹل اٹی رہینگ نا موکل نا بارواٹی یونیورسٹیک تینٹ فیصلہ کیرہ۔ اوپارے کہ پی ایچ ڈی کروک آ طالب علم و ہراطالب علم تینا پروجیکٹ کن لیب اٹ کاریم کننگ ءُ اوفتے ہم یونیورسٹی تیا بننگ نا موکل مریک۔ بنجائی وزیر تعلیم پارے کہ چندی کسب آتا تعلیم تروک آ ادارہ غاک ہراڑے طالب علم آتے فیکٹری و ورکشاپ اٹی تعلیم تننگ انگ ءِ ہم تینا تعلیمی سرجزآتے برجاتخرہ۔ اوپارے کہ اسکول آتیٹی استاد آتے بننگ نا موکل مریک و دابارواٹی اسکول تینٹ فیصلہ کیک کہ اودے اخس استاد آتا گرج ءِ۔ بنجائی وزیر پارے کہ تعلیمی بورڈ انا امتحانک مارچ اپریل نا جاگہ غا مئی جون اٹی کرفنگ نا سلاہ ءِ وخت اس کہ تعلیمی نسخان ءِ پورو کننگ کن باسنی نا چھٹی تے منسوخ کننگ و پوسکن آ تعلیمی سال ءِ اگست اسکان دننگ ناہم سلاہ ءِ۔ داوخت آ وزیراعظم نا خصوصی کمکار قومی جان جوڑی ڈاکٹر فیصل سلطان پارے کہ تدوک آ منہ دے آن ملک اٹی کورونا نا حالیت آک ترندی اٹ بگڑینگ انگ ءُ و کیس آتا مثبت بننگ نا اوسط 7 درسد اساکن مسنے۔ اوپارے کہ دا بے کچ اہم ءُ موقع اسے کہ دابارواٹی دمدستی فیصلہ اس کننگے تانکہ ناجوڑی نا تالانی ءِ توننگ مرے۔ اوپارے کہ داوڑنا حالیت آتے مون آ تخسا دا فیصلہ غاتے کننگ انگ ءِ۔ داکان مست دیوان اٹی غٹ صوبہ غاتا وزیر تعلیمک آن لائن بشخ ہلکر و تینا تینا صوبہ غاتیٹی کورونا نا حالیت و تعلیمی سرجزآتیان دیوان ءِ معلومدار کریر۔ اوفک داحالیت آتیٹی تعلیمی سرجز آتیکن چندی سلاہ تسر۔ داوخت آ وزارت جان جوڑی نا کنڈآن کورونا نا حالیت آتیا دیوان ءِ حوال تننگا۔
