اسلام آباد۔ 23 نومبر (اے پی پی) قومی احتساب بیورو(نیب) انا چیئرمین جسٹس (ر) جاوید اقبال پارینے کہ نیب ملکی شونداری و شونہالی کن بزنس کمیونٹی نا کڑدءِ امنا کیک۔ داخیال آتا درشانی ءِ او چیئرمین پنجاب فلور ملز ایسوسی ایشن عاصم رضا نا کماشی ٹی پاکستان فلور ملز ایسوسی ایشن نا ڈل اتون گپ وتران کرسا کرے۔ ڈل اٹی مسکوہی چیئرمین پنجاب فلور ملز ایسوسی ایشن، محمد ریاض، مسکوہی وائس چیئرمین، محمد جمیل، سیکرٹری جنرل محمد منیر و ملک غلام مصطفیٰ عارف اوار ئسر۔ چیئرمین نیب جسٹس (ر) جاوید اقبال پارے کہ نیب بزنس کمیونٹی نا سیلز و انکم خراج آتا بابت مقدمہ غاتا پیروی ءِ کپننگ ءِ و ساڑی آ سیلز و انکم خراج آتا بابت غٹ مقدمہ غاتے فیڈرل بورڈ آف ریونیو ءِ کانود نا رداٹ کارروائی کن گدریفنگانے۔ اوپارے کہ ملتان، بہاولپور و ڈیرہ غازی خان ڈویژن نا فلور ملز مالک آتے جاری کروک آ نوٹس آ برپرمان عملدرآمد ءِ توننگانے انتئے کہ داسہ معاملہ تعلقدار عدالت اٹی زیر سماعت ءِ۔ وخت اس کہ اینٹی کرپشن پنجاب ہم دا باندات نا جاست وپاست ءِ کننگ ءِ۔ چیئرمین نیب جندانا حیثیت اٹ مقدمہ غاتا جاچ ءِ ہلیک۔ اوپارے کہ مل انا مالک آک سرکاری نرخ آتیا الس ءِ نُت فراوان کیر۔ اوپارے کہ دا بیرہ ہوکا ءُ نیب انا کارروائی تا سوب بزنس کمیونٹی زہمی مننگ ءِ، دا تاثر راست اف۔ اوپارے کہ نیب انا چندی احتساب عدالت آتیٹی وڈی خوری نا 1210 ریفرنس زیر سماعت ءُ۔ ہرافتیان اِرادرسد بزنس کمیونٹی نا برخلاف ءُ۔ ہراڑآن نیب انا برخلاف دا تاثر نا پروپیگنڈا نا نفی مریک۔ بزنس کمیونٹی ملک انا زرگزرانی شونداری ٹی اہم کڑد ادا کننگ ءِ۔ اوپارے کہ بزنس کمیونٹی شونہال مریک تو ملک شونہال مریک۔ نیب کانود نا رداٹ تینا فرض ءِ پورو کننگ ءِ۔ چیئرمین نیب وڈٛی خوری نا بابت شاری تا غاوتے بِننگ کن ہر تُو انا ایسراٹ پنچ شنبے نادے آ کھلی کچہری اس خلنگ نا فیصلہ کرے۔ نیب نئے بیرہ سد آ شاری تا غاوتے بنگونے بلکن نیب ءِ ہزار آ غاو ہم رسینگانے ہراکہ 2019 ء نا مقابلہ ٹی اِرا ہنداخہ ءُ۔ نیب غیر کانودی ہاؤسنگ سوسائٹی و مضاربہ اسکینڈل اٹ ہم کارروائی کننگ ءِ۔ اوپارے کہ بزنس کمیونٹی ملک اکن تمبہ نا حیثیت تخک۔ بزنس کمیونٹی نا ویل آتے ایسر کننگ نیب انا اولیت ءِ۔ ہنداخاطرآن نیب ہیڈکوارٹر و غٹ علاقائی بیورو تیٹی بزنس کمیونٹی نا ویل آتا ایسری کن خصوصی غاو سیل اس جوڑ کرینے۔ تدوک آ سال نیب ہیڈکوارٹر اٹ بزنس کمیونٹی نا ویل آتا ایسری کن اسہ ڈائریکٹر اسے نا کماشی ٹی خصوصی سیل اس جوڑ کننگاسس۔ نیب کانود نا رداٹ بزنس کمیونٹی نا ویل آتا ایسری کن ہروڑ کوشست کننگ ءِ۔ ڈل بزنس کمیونٹی نا ویل آتا ایسری کن چیئرمین نیب جسٹس جاوید اقبال نا جند انا کوشست آتا ستاءِ کرے و نیب آ پت انا درشانی ءِ کرے۔ اوکرپشن فری پاکستان کن ملک آن وڈی خوری نا چٹفنگ کن نیب انا کوشست آتا ستاءِ کرے۔ اودابابت پاکستان فلور ملز ایسوسی ایشن نا کنڈآن ہروڑکمکاری نا باوری کرفے۔
