اسلام آباد۔30اکتوبر (اے پی پی): مزن وزیر عمران خان ءَ گوشت کہ نبی کریم ﷺ ءِ شان ءَ گستاخی اچ رنگ ءَ قبول نہ کناں۔ مزن وزیر عمران خان ءِ راجی رحمتہ العالمین ﷺ ءِ کانفرنس ءَ گڈی سیشن ءَ گشتانک دیان ءَ گوشت کہ مسلمان ملک آناں یکجا ءُ یک مشت بوھان ءَ روبرکتی ملک آناں گوشگ لوٹ ایت کہ اے رنگیں گامگیج ءَ چہ سد ارب مسلمان آنی دل آزاری بوتگ، یورپ ءَ ہولوکاسٹ ءِ بابت ءَ تران کنگ نہ بیت، گوستگیں زمانگ ءَ منصوبگ بندی نہ کنگ ءِ سبب ءَ ھرابیں جاور سہرا بوتگ۔ آئی ءَ گوشت کہ اے کانفرنس ھمک سال برجم کنگ بیت، پاکستانی الس ھاسیں رنگ ءَ ورنا آناں حضور اکرم ﷺ ءِ بستار ءَ سرجمیں سرپدی دیگی انت۔ حضرت محمد ﷺ ءِ زندمان مئے واستہ یک روشنائیں کشک ات۔ آئی ءَ گوشت کہ محمد مصطفیٰ ﷺ ءِ نام درستاں چہ بزتر انت، سرڈگار ءِ سر ءُ آزمان ءِ ملائکت ءُ کل جہان آنی تہ ءَ استیں پروردگار ءِ پیداک کتگیں درستی نپس دار ءُ بے نپس آں چہ محمد مصطفیٰ ﷺ ءِ کد ءُ بالاد بے درور مستر ءُ بزتر ھدا وند ءَ کتگ۔ آئی ءَ گوشت ھمک بنی آدم ءَ محمد ﷺ ءِ زندمان ءِ بھر آنی بابت ءَ سئیگ ءُ سرپد کنگ لوٹ ایت۔ مزن وزیر ءَ سیر النبی ﷺ ءِ بن گپ ءِ سر ءَ وانگی کتاب نبشتہ کنوکیں ند کار آنا ں داد بھر کت۔ کانفرنس ءَ بنجاھی وزیر ، جتا جتائیں ملک آنی سفیر ءُ جتا جتائیں سسا ساچ آنی گوما سیادی داروکیں عالم آں بھر زوری کت۔ کانفرنس ءِ گڈی سیشن ءَ صدر مملکت ڈاکٹر عارف علوی ءَ ھم گشتانک دات۔
