اسلام آباد۔ 29 اکتوبر (اے پی پی) قومی اسمبلی ءِ پاننگانے کہ 94 المی آ دوائی تا نہاد آتے جون 2021ء اسکان کیپ کننگانے و دا دوائی تا نہاد آتیٹی ودکی مننگ کپک، نہاد آتیٹی ودکی نا اختیار ساڑی حکومت فارماکمپنی تیان پدی ہلسا ڈریپ ءِ تسنے۔ پنچ شنبے نادے آ قومی اسمبلی ٹی دوائی تا نہاد آتیٹی ودکی نا بابت خواجہ شیراز محمود و ایلو باسک آتا چکاری نوٹس آ وزیر مملکت پارلیمانی امور علی محمد خان ایوان ءِ پارے کہ المی آ دوائی تا نہاد آتیٹی اسہ وار ولدا ودکی نا منظوری ءِ تننگاسس۔ 2015ء نا ڈرگ پالیسی 2016ء ٹی لاگو مس۔ اولیکو وار دوائی تا نہاد آتے سی پی آئی اٹ مربوط کننگا۔ گڑاس فائدہ و گڑاس نسخان مس۔ داٹی نہاد آتیٹی ودکی نا اختیار فارما کمپنی تیا ہنا۔ ساڑی حکومت جولائی 2020ء ٹی دا اختیار ءِ پدی ہلک و داڑآ وزارت/ڈریپ نا چاروکی ءِ مقرر کننگا۔ داٹی تُو انا ٹائم فریم تننگانے۔ مسکوہی حکومت فارماکمپنی تے پورو اختیار تس دانا ہرانسخان مسنے اونا ورندی بایدے ملے۔ المی دوائی تا نہاد آتا کچ 94 ءِ۔ جون 2021ء اسکان دافتا نہاد آتیٹی ودکی مننگ کپک۔ خواجہ شیراز نا سوج آ او پارے کہ ساڑی حکومت فارما سیوٹیکل کمپنی تے قاعدہ و ضابطہ نا پابند کرینے۔ مسکوہی پالیسی نا نسخان دائس کہ داٹی ڈریپ انا کنٹرول چٹاسس و فارما کمپنیک تینا مرضی اٹ نہاد آتے ودفیرہ۔داسہ دانا چاروکی نا نظام اس جوڑ کننگانے۔ اوپارے کہ 94 دوائی تیٹی ایسیفیلوزومیٹ نا سرکاری نہاد اِرا روپئی ئس، دا نہاد وارہ کنتوکہ۔ اِرا روپئی نا دوائی 50 روپئی ٹی ملاکہ داسہ دانا نہاد 7 روپئی ءِ۔ ہنداوڑ ایڈرینالین و ایٹروپین آپریشن تھیٹر کاریم اٹ اتنگ نا دوا ئسر۔ دافتا نہاد آتے ہم معقول کننگانے۔ نور عالم خان پارے کہ نن عمران خان نا ٹکٹ آ ضرور سرسہب مسونن ولے دانا دا مطلب اف کہ غریب آتا برخلاف گام گیج مرے و نن چپ مرین۔ اوپارے کہ مسہ وار نہاد آتیٹی ودکی مسنے۔ 60 روپئی نا دوا داسہ 360 روپئی مسنے۔ حکومت ءِ دوائی تے اڑزآن کروئی مریک۔ علی محمد خان پارے کہ چاہندار آتا تقرر وزیراعظم نا اختیار ءِ۔ ڈاکٹر فیصل سلطان نا اسہ پن اسے۔ اوپارے کہ 94 دوائیک کل دوائی تا 1.5 درسد ءُ۔ 89 دوائی تا نہاد آتیٹی کمتی کننگا۔ دافتے ٹی کینسر، اینٹی بائیو ٹک و چناتا دوائیک ہم اوار ئسر۔ اوفتا نہاد آتیٹی 45 درسد کمتی کننگا۔ ریاض فتیانہ پارے کہ امپورٹ ڈیوٹی ختم یا کم کننگ آن نہاد آتیٹی ودکی مننگ کتوکہ۔ علی محمد خان پارے کہ وزارت جان جوڑی و ڈریپ اتون وسیلہ غاتا کمتی ءِ۔ بنجاءِ صوبہ غاتا کمک نا گرج مریک۔ فارما کمپنی تے کورونا دین انا دور اٹی دوائی تا نہاد آتے ودفپننگ نا درخواست کننگا اوکان پد دا کمپنیک جولائی اگست اٹی نہاد آتے ودفتوس و داستمبر اٹی ودفنگا۔
