فرانسیسی صدر نا بیان نا ترندی اٹ مذمت ءِ کینہ، صدر آزاد جموں و کشمیر سردار مسعود خان نا ’’بین المذاہب ہم آہنگی‘‘ نا سرحال آ انٹرنیشنل کانفرنس آن تران

لاہور۔ 29 اکتوبر (اے پی پی) صدر آزاد جموں و کشمیر سردار مسعود خان فرانسیسی صدر نا بیان نا ترندی اٹ مذمت ءِ کرسا پارینے کہ دنیا ٹی بین المذاہب ہم آہنگی آن بیدس امن مننگ کپک، بھارت کشمیری تا خون ءِ بیرہ دا بنداو آ کننگ ءِ کہ او مسلمان ءُ۔ پاکستان اٹ غٹ اقلیت آک آجو و رکھ ءُ، بھارت کشمیری تا نسل کشی ءِ کننگ ءِ، داخیال آتا درشانی ءِ او پنچ شنبے نادے آ داڑے ہندی ہوٹل اٹی نیشنل پیس کمیٹی نا کنڈآن ’بین المذاہب ہم آہنگی‘ نا سرحال آ انٹرنیشنل کانفرنس آن تران کرسا کرے۔ کانفرنس نا مہمان خاص صدر جموں و کشمیر سردار مسعود خان ئس۔ داوخت آ مولانا محمد عاصم مخدوم، حاجی عامر رشید، جیمز چین و غٹ مذہب آتیان تعلق تخوک آ سرکڑدہ، عالم دین و ایلوفک بشخ ہلکر۔ صدر آزاد جموں و کشمیر سردار مسعود خان تران کرسا پارے کہ خاکہ غاتا بابت ہرادنیا ٹی ماحول جوڑ ءُ داٹی بین المذاہب ہم آہنگی وخت انا گرج ءِ۔ دنیا ٹی امن ءِ برجاتخنگ کن اسہ ایلو نا مذہب نا شرف بھاز المی ءِ۔ اوپارے کہ نن فرانسیسی صدر نا بیان نا ترندی اٹ مذمت ءِ کینہ داڑآن فرانس ءِ ہچ اس دوبفک بلکن الٹا نسخان مریک۔ بھارت کشمیر اٹی مسلمان تا نسل کشی ٹی اختہ ءِ۔ صدر آزاد جموں و کشمیر پارے کہ بھارت کشمیر نا مسلمان تیا ظلم بیرہ داخاطرآن کننگ ءِ کہ او مسلمان ءُ۔ پیس کانفرنس آن تران کرسا تحریک نوجوانان پاکستان نا چیئرمین عبداللہ حمید گل نا پاننگ ئس کہ فرانس نا داوڑنا گام گیج آتیان جہانی امن ءِ نسخان مریک۔ انت خاکہ جوڑ کرسا امن نا خذمت ءِ کننگ مریک؟ اسلام غٹ مذہب آتے منوک آ مذہب ءِ۔ فرانس داوڑ انت اکن کننگ ء، انت او دا ہُننگ خواہک کہ مسلمان تیٹی جوزہ جہاد چٹیتنے تو۔ مولانا محمد عاصم مخدوم پارے کہ نیشنل پیس کمیٹی نا ارکان اسلام و پاکستان نا زیباانگا دروشم ءِ پیش کننگ ءِ، پاکستان اٹی غٹ اقلیت آک آجو و رکھ ءُ۔ دنیا ٹی امن کن اسہ ایلو نا مذہب آتا شرف المی ءِ۔ فرانس نا کنڈآن خاکہ غاتا اشاعت آ ترندی اٹ مذمت ءِ کینہ۔ حاجی عامر رشید خان، فادر جیمز چین، سید محمود غزنوی، علامہ سید فرمان رضاعابدی، نائیجیریا نا پاسٹر نیکسن و علامہ زاہد الراشدی تون اوار ایلوفک ہم پیس کانفرنس آن تران کریر۔