اسلام آباد۔ 29 اکتوبر (اے پی پی) بنجائی وزیر حوالکاری وشینکاری سینیٹر شبلی فراز پارینے کہ چین پاکستان اقتصادی راہداری ڈٹ ءِ مسکوہی حکومت جند انا ڈٹ جوڑ کریسس، دُن ءُ اسہ ادارہ اس ہم اف ہرادے اوفک بھس کتنو، ملک ءِ گہیو تخفیر، سی پیک نا ڈٹ انا بھلو دشمن ءُ، سی پیک چین و پاکستان نا الس نا مہرومریبت نا وڑاس مریک، سی پیک اتھارٹی نا بل قومی اسمبلی ٹی اینو پیش کننگ انگ ءِ، سی پیک اتھارٹی نا بابت چکاری نوٹس نا تحریک بدنیتی آ مبنیءِ، داوڑنا گام گیج آتیان سنگت آتے غلط کلہو کاہک و دشمن تے خوشی مریک، اپوزیشن ءِ سچ بِننگ نا حوصلہ اف، ہروڑنا سازش سی پیک ڈٹ ءِ ڈی ریل کننگ کپک۔ پنچ شنبے نادے آ ایوان بالاٹی سینیٹر رضاربانی نا سی پیک اتھارٹی آرڈیننس نا بابت چکاری نوٹس نا ورندی ءِ ترسا بنجائی وزیر حوالکاری پارے کہ سی پیک ہندن ءُ ڈٹ اسے ہرااسہ ہم سیاسی جماعت اسے نا ڈٹ اف، ، دا چین و پاکستان نا حکومت و الس نا ڈٹ ءِ، دادے غیر سیاسی کننگ و دانا اہمیت ءِ تالان کننگ و داڑآ کاریم ءِ مون آ دننگ کن نن سی پیک اتھارٹی جوڑ کرین و آرڈیننس نا کمک اٹ دادے جوڑ کننگا۔ بدبختی اٹ ملک اٹی قومی فائدہ غاتا انت کہ کاریم اس مرے اپوزیشن اوٹی اڑاند شاغک و اوڑآ اعتراض کیک، اوقائمہ کمیٹی تیٹی منظور مروک آ فیصلہ غاتے ہم تینٹ مسترد کریر، اپوزیشن سچ بننگ نا حوصلہ تخے ولے دا سچ خف توننگ کپسہ۔ سی پیک آ پبی وڑاٹ کاریم برجاءِ و دا پاکستان و چین نا الس نا نیام اٹ سوگو رشتہ غاتا نشانی ءِ، سی پیک اتھارٹی نا بل ءِ اینو قومی اسمبلی ٹی پیش کننگ انگ ءِ، ولدا نن ہرنہ کہ دادے منظور کرفنگ اٹ دا اخس کمک کیرہ، اپوزیشن ایلو ادارہ غاتے تہس نہس کننگ نا بے سہب کوشست کریسس، سی پیک اتھارٹی ءِ بے سہب کننگ نا کوشست ءِ سرسہب مننگ کن الیپنہ، ایوان اٹ پیش کروک آ دا تحریک بدنیتی آ مبی ءِ، بل قومی اسمبلی آن منظوری آن پد سینیٹ اٹ ہم بریک۔ اوپارے کہ اپوزیشن اسہ ادارہ اسے ہم ہلیتو، سی پیک نا سیاسی، کانودی، خارجہ و پین پلو ءُ و دا چین و پاکستان نا الس نا ڈٹ ءِ، داڑآ ہیت انا برخلاف ہیت کننگ آن سنگت آتے غلط کلہو کاہک و دشمن تے خوش کننگ نا کوشست کننگک، نن خوانہ کہ دا مخلوق سنگت آتے غلط کلہو تفس۔ اوپارے کہ نن چین انا الس و حکومت ءِ باور کرفنگ خوانہ کہ سی پیک آ کاریم پبی وڑاٹ مننگ ءِ، پیش رفت سلتنے، پوسکن آ عزم اٹ دا ڈٹ مون آ کاہک۔ تدوک آ حکومت دادے جند انا ڈٹ جوڑ کریسس، نن خوانہ کہ دادے غیر سیاسی کننگے، نن ہمو ادارہ غاتے سوگو کرینن ہرافتے دافک بھس کریسر و ملک ءِ گہیو تخفیسر۔ اوپارے کہ چکاری نوٹس آ تعلقدار وزیر نا ورندی تننگ آن پد سوال جواب مننگ کپک۔
