اسلام آباد۔29اکتوبر (اے پی پی): سینیٹ ءِ ڈپٹی چیئرمین سلیم مانڈوی والا ءَ دیوان ءَ بنجاہی وزیر سینیٹر شبلی فراز ءَ را پالیسی بیان دیئگ ءَ مکن کتگ کہ ایشیءِ چہ جاورھال ناگیگ بوتگ اَنت ءُ حکومتیءُ اپوزیشن باسکانی نیام ءَ دپ جنگی بوتگ۔ پنچ شمبے ءِ روچ ءَ ایوان بالا ءِ دیوان ءَ جستءُ پُرس ءِ وہدءَ بنجاہی وزیر ءَ پالیسی بیان دیئگ ءِ ھاترءَ ڈپٹی چیئرمین ءَ گوں دزبندی کتگ گڈا اپوزیشن باسکاں کوکارءُ جگّا کتگ ءُ ڈپٹی چیئرمین ءَ گشتگ کہ پالیسی بیان دیئگ ءِ ھاترءَ درستاں پیش سینیٹ سیکرٹریٹ ءَ را نبشتہ کنگ ءُ سرپد کنگ بہ بیت۔ سینیٹر شبلی فراز ءَگشتگ کہ قاعدہ 265 ءِ ردءَ آئی ءَ را پالیسی بیان دیئگ ءِ حق اَست۔ آئی ءَ گشتگ کہ مرچی آ دلپروش ءُ گمیگ اِنت ءُ اے دل رنجی ءِ سبب سیاسی ءُ ذاتی نااِنت، سوشل میڈیا ، روہتاک آئی ءَ دیستگ اَنت، بھارتی چینل کہ ہرچی پیش دارگ ءَ اَنت ایشانی گندگ ءَ من ءَ باز افسوز ءُ رنج اِنت کہ چے وڑءَ اپوزیشن یک بیانیہ ءَرا زورگ ءُ رہادگ اِنت کہ ایشی ءِ سفر گوجرانوالہ ءَ چہ بندات بوتگ ءُ پدا کراچی ءُ کوئٹہ ءَ سربوتگ۔ اے موہ ءَ ڈپٹی چیئرمین ءَ آئی ءَ را گیش گپ کنگ ءَ مکن کتگ کہ ایشی ءِ پدءَ سینیٹر شبلی فراز ءَ گشتگ کہ آ حال ءُ اھیوال کاری ءِ وزیر ءُ حکومت ءِ جارچین بوہگ ءِ ارزشت ءَ من ءَ پالیسی بیان دیئگ ءِ موکل دیئگ بہ بیت۔ اے وہد ءَ ملک ءِ حلاپ ءَ بیان دیئگ بوہگ ءَ اِنت، اے پالیسی بیان باز حاس ءُ ارزشت داریت بلے ڈپٹی چیئرمین یکوئی ءَ من ءَ مکن کنگ ءَ اِنت۔ اے موہ ءَ قائد ایوان سینیٹر ڈاکٹر وسیم ءَ گشتگ کہ حال ءُ اھیوال کاری ءُ شنگکاری ءِ وزیر 265 ءِ ردءَ پالیسی بیان دات کنت چیا کہ آ حکومتی جارچین اِنت۔ ڈپٹی چیئرمین ءَگشتگ کہ آ پالیسی بیان بے شک بہ دنت بلے ایجنڈا ءَ پد بہ دنت۔ قائد ایوان ءَ گشتگ کہ ایجنڈا ہلاس بوہگ ءَ پد درستیں باسک پاد کایاں ءُ رؤنت ءُ کس پہ گوشدارگ ءَ اَست نابیت ۔ اے موہ ءَ قائد حزب اختلاف سینیٹر راجہ ظفر الحق ءَ ہم گشتگ کہ زمہ واریں مردماں وتی زمہ واریانی یات گیجگ لوٹ ایت، پشاور ءِ وئیل ءِ سرءَ سینیٹر مشتاق احمد ءَ را گپ کنگ ءِ موکل دیئگ بہ بیت۔ سینیٹر شبلی فراز ءَ گشتگ کہ اِدءَ گوست ءَ ہمامردماں رھبنداناں لگت مال کتگ کہ وتءَرا آئین ءِ چیمپئن لیک اَنت، اپوزیشن ءَ را راستی ءِ گوشدارگ ءِ حوصلہ نیست۔ حال ءُ اھیوال کاری وزیر ءُ قائد ایوان ءِ گشگ ءَ پد ہم سینیٹ ءِ ڈپٹی چیئرمین ءَ حال ءُ اھیوال کاری ءُ بنجاہی وزیر ءَ را ایوان ءِ تہ ءَ پالیسی بیان دیئگ ءِ موکل نادات۔
