اسلام آباد۔ 29 اکتوبر (اے پی پی) وزیراعظم عمران خان خواجہ نبی کریم صلی اللہ علیہ و آلہ وسلم نا بارواٹی فرانسیسی مصنف، شاعر و سیاستدان الفونسے ڈی لمر ٹائن نا خیال آتے پسندیدہ گوندسا ٹویٹر آ شیئر کرینے۔ پنچ شنبے نا دے آ وزیراعظم عمران خان تینا ٹویٹ اٹی پارے کہ فرانسیسی دانشور خواجہ نبی کریم صلی اللہ علیہ و آلہ وسلم نا بابت انتس کہ پارے کہ او اونا پسندیدہ ترین نوشت ءِ، فرانسیسی مصنف خواجہ اکرم صلی اللہ علیہ و آلہ وسلم نا عظیم جہد ءِ خراج عقیدت پیش کرسا پاریسس کہ آپ صلی اللہ علیہ و آلہ وسلم نا عظیم ترین شخصیت نا پین اسٹ تون موازنہ ءِ کننگ مفک، دنیا ٹی چندی بھلا شخصیت آک ہنانوہرافک بھلو بھلو فوج تیار کریر، کانود جوڑ کریر و سلطنت جوڑ کریر ولے اوفک مادی واک آ چکار تخار ہرا اکثر و گیشتر اوفتا خنتا مون آ نیست ونابود مسر وخت اس کہ خواجہ نبی کریم صلی اللہ علیہ و آلہ وسلم نئے بیرہ لشکر تیار کرے و کانود جوڑ کرے، ریاست جوڑ کرے و افرادکار تیار کرے بلکن آپ صلی اللہ علیہ و آلہ وسلم تینا وخت انا آباد دنیا نا اسہ تہائی آبادی آ تالان لکھ آ انسان تا زند اٹی ہندن ءُ بدلی اس ایس کہ اوفتا مسخت حیات و مطمع نظر ہی بدل مس، اوفتا معبود، اوفتا عبادت گاہ، اوفتا عقیدہ و افکار غٹ بدل مسر۔
