ملتان۔28 اکتوبر (اے پی پی) وزیر خارجہ مخدوم شاہ محمود قریشی پارینے کہ دہشت گردی آن ننا زرگزران ءِ نسخان رسینگا، نن دہشت گردی ءِ شکست تسن، اوغانستان اٹی امن نا عمل برجاءِ و پاکستان داٹی اہم کڑد ادا کننگ ءِ۔ داخیال آتا درشانی ءِ او ملتان اٹی پوسکن تفوک آ شاپنگ مال انا بناءِ کننگ نا وخت آ تران اٹی کرے۔ اوپارے کہ پاکستان اٹی زرکاری داجاگہ نا زرگزرانی بحالی نا شاہدی ءِ۔ داشاپنگ مال جرمن کمپنی جوڑ کرینے و پاکستان اٹی جرمنی یانزدہ سال آن پد زرکاری کرینے۔ اوپارے کہ پاکستان نا ہر بشخ اٹی کمک کننگ آ نن جرمن حکومت نا منت وار اُن۔ وزیر خارجہ پارے کہ بروک آ دے تیٹی ملتان کمرشل بزنس نا بنجامریک۔ ہراوڑ جرمنی پاکستان اٹی زرگزران نا بحالی کن کمک کننگ ءِ و ہراوڑ او پاکستان اٹی زرکاری کننگ ءِ داڑآن اومیت ءِ کہ ایلو یورپی ملک آک ہم پاکستان آ پت کیرہ۔ نن جرمنی نا شاری تے ویزہ تننگ اُن و دانا مسخت زرکارآتے تینا کنڈآ چکنگ نا ءِ۔ سی پیک نا سوب آن پاکستان بھازاہمیت اختیار کرینے،۔ جرمن زرکارآتے پاکستان اٹ بخیر اٹ پاننگک۔ اوپارے کہ بیست ءُ یک می صدی ٹی سیاسی تعلقداری تون اوار اوار زرگزرانی تعلقداری ہم اہمیت اختیار کرینے۔ سویلی پنجاب اٹی ٹیلنٹ ارے دا علاقہ ءِ مستین اٹ گوجالنگا۔ داڑے داسہ انڈسٹری لگنگ ءِ۔ وزیر خارجہ پارے کہ نن زرکار دوست پالیسی جوڑ کننگ اُن، پاکستان اٹی کورونا غان بھلو کچ اسے ٹی مخلوق زہمی مس۔ ننا ملک اٹی زیات آبادی ورناتا ءِ نن اوفتا ویل آتے ایسر کینہ۔ اوپارے کہ ہراکہ حکومت اقتدار اٹی برے تو اوڑکن سرکاری ملازم آتے تنخواہ تننگ نا ویل مریک ہنداخاطرآن نن نجی بشخ آ چکار کننگ اُن تانکہ روزگار نا زیات آن زیات وارخواہی ودی مرے۔ وزیر خارجہ پارے کہ دا شاپنگ مال آن ہم ملتان اٹ روزگار نا وارخواہی ودی مریک۔
