اسلام آباد۔ 28 اکتوبر (اے پی پی) چیئرمین سینیٹ صادق سنجرانی پارینے کہ پاکستان و روس ڈیہہ نا شونداری و شونہالی کن جوان کڑد ادا کننگ نا لائخی تخرہ، پاکستان اسہ پرامن ءُ ملک اسے و امن و شونداری نا اہمیت ءِ پہہ مریک۔ داہیت ءِ او روس انا سفیر تون اوڑدہی ٹی پارے۔ اوڑدہی ٹی ہڑتوم آ کنڈآتا اہم باندات آتیا گپ وتران کننگا۔ چارشنبے نادے آ سینیٹ سیکرٹریٹ نا کنڈآن جاری بیان نا رداٹ چیئرمین سینیٹ صادق سنجرانی پارے کہ پاکستان روس اتون تینا کثیر الجہتی مراسم ءِ قدر انا نظر اٹ ہرک، ہڑتوم آ ملک آتا نیام اٹ اسٹریٹجک پارٹنر شپ آن علاقائی امن و شونداری ٹی کمک رسینگک۔ اوپارے کہ ڈیہہ نا ترندی اٹ بدل مروک حالیت آک سوگو رابطہ کاری نا وڑوڈول ءُ، ہڑتوم آ ملک آتا نیام اٹ سیاسی، سفارتی و اقتصادی کمکاری ٹی گچینی مون آ بسنے۔ اوپارے کہ جہانی کہول آ کمکاری اسہ ایلو آ پت انا ڈیک ءِ ۔ پاکستان و روس انا تعلقداریک ڈیہہ نا شونداری و شونہالی کن ہم جوان پک مننگ ءُ۔ چیئرمین سینیٹ محمد صادق سنجرانی پارے کہ واپار و السی کہول آ رابطہ غاتیان بیدس ایلو بشخ آتیٹی کمکاری کن بھلو وارخواہی اس ارے، واپاری کچ ءِ ودفنگ کن ہڑتوم آ ملک سنجیدگی اٹ رابطہ غاتیٹی ءُ، تین پہ تینی کمکاری نا کمک اٹ واپاری کہول آ رابطہ غاتے ودفنگ کن بھلو وارخواہی اس ساڑ یءِ۔ اوپارے کہ روس و پاکستان ڈیہہ نا شونداری و شونہالی کن گچین کڑد ادا کننگ نا لائخی تخرہ، پاکستان اسہ پرامن ءُ ملک اسے و امن و شونداری نا اہمیت ءِ پہہ مریک۔ اوپارے کہ پارلیمانی رابطہ کاری نا کمک اٹ ہڑتوم آ کنڈآتا کمکاری و السی کہول آ رابطہ غاتے پین مون آدننگ اٹ کمک رسینگک۔ دا وخت آ گپ وتران کرسا روسی سفیر پارے کہ پاکستان روس اکن بے کچ اہم ءُ ملک اسے و نن پاکستان تون ہڑتوم آ کنڈآتا کمکاری ءِ راجی و اقتصادی کہول آ پین ودفنگ نا خواہنداراُن۔
