اسلام آباد۔ 28 اکتوبر (اے پی پی) بنجائی وزیر مواصلات مراد سعید پارینے کہ گلگت بلتستان ءِ زوت صوبہ اس جوڑ کننگک، مستین نا حکومت آتیا افسوز ءِ کہ متکن آ خواست ءِ پورو کننگ نا جاگہ غا دروغ انا دعویٰ تے اٹ قطبی علاقہ نا مخلوق ءِ ریفسا کریر۔ داخیال آتا درشانی ءِ او دورہ گلگت بلتستان نا شیڈول نا جاری کننگ نا بابت اسہ بیان اسے ٹی کرے۔ اوپارے کہ او بروک آ ہفتہ غان گلگت بلتستان نا دورہ ءِ کیک۔ اوپارے کہ افسوز ءِ کہ داخہ در بھلا السی خواست ءِ مستین نا حکومت آک پورو کتوس۔ گلگت بلتستان نا سی پیک اٹ اہم کڑد اسے ولے مستین نا حکومت آک اسپیشل اکنامک زون جی بی کن تتویسر۔ عمران خان منظوری آن پد ہموڑے اکنامک زون انا جوڑ کننگ کن ڈغار نا تعین ءِ ہم کرے۔ اوپارے کہ انشاء اللہ اکنامک زون انا جوڑ کننگ آن ورناتے روزگار نا وارخواہی دوبریک و انڈسٹریل زون ہم جوڑ مریک۔ خیبرپختونخوا آنبار آزاد کشمیر و گلگت بلتستان نا سد درسد آبادی ءِ مفت و گچین درمان کن جان جوڑی انصاف کارڈ انا ہم منظوری مریک۔ انشاء اللہ جی بی حکومت جوڑ کننگ تون ہر شاری ءِ ہفت لکھ بیست ہزار اسکان مفت و گچین درمان نا آسراتی مریک۔ مراد سعید پارے کہ گلگت آن شندور و شندور آن چترال سڑک ہم جوڑ مریک ہرانا منظوری مسنے ہرا سی پیک نا دیکی روٹ انا تغ ءِ پورو کیک۔ دا ڈٹ آن گلگت نا سیل و سوات اٹ ودکی مریک مخلوق ءِ روزگار ملک۔ گلگت بلتستان اٹی 2 نیشنل پارک و سیل و سوات نا پروگرام تیان مخلوق ءِ روزگار ملک۔ جی بی ٹی حکومت جوڑ کرسا انشاء اللہ جی بی ٹی ہم شونداری نا سفر بناکیک۔
