اسلام آباد۔ 28 اکتوبر (اے پی پی) قومی اسمبلی ءِ پاننگاکہ فروری 2019ء ٹی پلوامہ جلہو آن پد بھارت پاکستانی اِلار نا درآمد آ 200 درسد ڈیوٹی عائد کرے، وزارت واپار برآمد آتے گیگ بدل غیر رسمی منڈی تیٹی گدریفنگ کن بست و بند کرینے۔ چارشنبے نادے آ قومی اسمبلی ٹی سید جاوید علی شاہ جیلانی نا سوج آ وزارت واپار نا کنڈآن ایوان ءِ معلومدار کننگاکہ پاکستان جہانی کہول آ اِلار ودی کروک آ 10 بھلا ملک آتیان 5 می و اِلار نابرآمد آتا بابت ہشت میکو بھلا ملک ءِ۔ پاکستان اٹی اِلار نا 300 آن زیات وڑ ودی کننگک وخت اس کہ دانا سالانہ پیداوار 5 لکھ 40 ہزار ٹن نا خڑک ءِ۔ ایوان ءِ پاننگاکہ ملکی و جہانی منڈی تیٹی پاکستانی اِلار نا خواست خاصی سوگو ءِ ولے دا رسمی وڑاٹ بھاز کم منڈی تسکان محدود مسنے۔ ملک انا خشک اِلار نا غٹ آن زیات بشخ بھارتی منڈی تیا ہناکہ پلوامہ جلہو آن مست بھارت 90 درسد آن زیات اِلار پاکستان آن درآمد کریکہ۔ پلوامہ جلہو آن پد بھارت پاکستانی اِلار آ دوسد درسد ڈیوٹی عائد کرے۔ پاکستانی بزغر و برآمد کنندگان دا ڈیوٹی نا سوب آن بھلو نسخان اسے نا دنگ آن سلسا کریر ولےوزارت واپار نا وخت آ نیام تمنگ آ دا برآمد آتے گیگ بدل غیر رسمی منڈی تیا گدریفنگا۔ ایوان ءِ پاننگاکہ پوسکن آ منڈی تا پٹنگ کن بھاز گام گیج کننگانے۔ ہارٹی کلچر ڈویلپمنٹ اینڈ ایکسپورٹ کمپنی و ٹریڈ ڈویلپمنٹ اتھارٹی آف پاکستان نا شریداری اٹ جامع روڈ میپ اس تیار کننگانے۔ چندی ملک آتیٹی واپاری ڈل و نمائش آتیٹی بشخ ہلنگ دا روڈ میپ انا بشخ ءِ۔ ایوان ءِ پاننگاکہ غیر کانودی وڑاٹ بھارت نا کوزہ ٹی جموں و کشمیر نا آئینی حیثیت ءِ چٹفنگ آن پد اگست 2019ء آ بھارت تون فارماسیوٹیکل مصنوعات آتیان بیدس واپار ءِ بند کننگانے۔ اوپارے کہ داوخت آ اسہ ملک اسے ٹی ہم الار نا برآمد آ ہچ ءُ پابندی اس اف۔
