اسلام آباد۔ 27 اکتوبر (اے پی پی) وزیراعظم عمران خان پارینے کہ جموں و کشمیر نا جھیڑہ نا جہانی حیثیت اقوام متحدہ نا سلامتی کونسل نا قرارداد آتیٹی تسلم شدہ ءِ ہرافتیا عملدرآمد مننگ سلوک ءِ، غٹ باسک ملک آتا اسیجائی زمواری ءِ کہ او بھارت ءِ تینا جہانی زمواری تے پورو کننگ نا پابند کیر، پاکستان جہانی برادری آ زور شاغک کہ بھارت ءِ ڈیہہ ٹی نزوری کن ریاستی دہشت گردی نا کاریم اٹ اتنگ آن توننگے وخت اس کہ کشمیر نا ویل ءِ اقوام متحدہ نا سلامتی کونسل نا قرارداد و کشمیری الس نا است خواہی تا رداٹ پرامن وڑاٹ ایسر کننگ آ بیوس کننگے، پاکستان کشمیری الس تون ہم کوپہ سلک و اوفتا روا حق خودارادیت نا دوئی کننگ اسکان ہرممکن مخ تفی ءِ برجاتخک۔ تہار دے کشمیر نا وخت آ تینا کلہو اسے ٹی وزیراعظم پارے کہ نن دادے ءِ بھارت نا غیر کانودی کوزہ نا مذمت و کشمیری الس کن تینا بدل مفروک مخ تفی نا وڑاٹ اڈتننگ اُن۔ تہار دے کشمیر انسانی تاریخ نا تہار ءُ بشخ اسے نا ڈیک ءِ ایتک ہراتم 73 سال مست بھارتی فورس آک ڈیہہ آ زوراکی اٹ کوزہ و کشمیری الس ءِ محکوم کننگ کن سری نگر اٹ شیف مسوسر۔ وزیراعظم پارے کہ جموں و کشمیر آ بھارت نا غیر کانودی کوزہ غان دا جہانی جھیڑہ اس مسنے ہرانا ایسری اقوام متحدہ نا چارٹر نا رداٹ سلامتی کونسل نا تعلقدار قرارداد آتون گنڈوک ءِ۔ اوپارے کہ تدوک آ ہفت دہائی آن زیات وخت آن بھلا بیدادی و جور و استبداد آن پد ہم بھارت کشمیری الس نا عزم و حوصلہ ءِ پرغنگ اٹ بے سہب مسنے۔ وزیراعظم پارے کہ بھارت نا ریاستی دہشت گردی، بے گناہ کشمیری الس نا عدالت آن ایڑتر شہیدی، سلاہ درشانی آ پابندی، جعلی مقابلہ، گھیڑ و سرچ آپریشن، حراست اٹی بیدادی و زوال، جبری گمشدگی، پیلٹ گن آتا کاریم اٹ اتنگ، کشمیری الس ءِ اجتماعی سزا تننگ کن اوفتا اُراتے بھس و خاخر تننگ و کشمیری تے محکوم تخنگ نا ایلو غٹ چم آتے کاریم اٹ اتنگ کشمیری الس نا حق خودارادیت نا دوئی کننگ نا روا جہد اکن اوفتا جوزہ و حوصلہ ءِ شیف خلنگ کتو۔ وزیراعظم عمران خان پارے کہ 5 اگست 2019 آ غیر کانودی بھارتی مقبوضہ جموں و کشمیر اٹی بھارت نا اسہ کنڈی کارروائی، فوجی گھیڑ، مواصلاتی رابطہ غاتے کشکنگ و جھیڑہ ئی علاقہ نا آبادیاتی تناسب ءِ بدل کننگ کون آ ایلو غیر کانودی گام گیج آک بھارت آ مسلط آرایس ایس نا ہندو توا نظریہ ءِ پین بے نقاب کرینو۔ بھارتی ہندوتوا نا شدت پسند نظریہ و اکھنڈ بھارت کون آ ناپاک عزم علاقائی امن و سوگوی ءِ خطرہ ٹی شاغانے۔ اوپارے کہ جموں و کشمیر نا تنازع نا جہانی حیثیت اقوام متحدہ نا سلامتی کونسل نا قرارداد آتیٹی امنا مروک ءِ ہرافتیا عملدرآمد مننگ سلوک ءِ۔ وزیراعظم پارے کہ دا غٹ باسک ملک آتا اسیجائی زمواری ءِ کہ او بھارت ءِ تینا جہانی زمواری تے پورو کننگ نا پابند کیر، پاکستان جہانی برادری آ زور شاغک کہ بھارت ءِ ڈیہہ ٹی نزوری کن ریاستی دہشت گردی نا کاریم اٹ اتنگ آن توننگے وخت اس کہ کشمیر نا ویل ءِ اقوام متحدہ نا سلامتی کونسل نا قرارداد و کشمیری الس نا است خواہی تا رداٹ پرامن وڑاٹ ایسر کننگ آ بیوس کننگے۔ ہندا اسٹ انگا وڑ ءِ ہرانا کمک اٹ سویلی ایشیا ٹی پائیدار امن و سوگوی ءِ پک کننگ مریک۔وزیراعظم پارے کہ پاکستان کشمیری الس تون ہم کوپہ سلک و اوفتا روا حق خودارادیت نا دوئی کننگ اسکان ہر ممکن مخ تفی ءِ برجاتخک۔
