اسلام آباد۔ 27 اکتوبر (اے پی پی) بنجائی وزیر حوالکاری و شینکاری سینیٹر شبلی فراز پارینے کہ 27 اکتوبر تاریخ نا ہمو تہار دے ءِ ہراتم ہندوستان جہانی کانود، غیور کشمیری الس نا است خواہی و حق آتے لتاڑسا مسلم گیشتری آبادی آ تالان ریاست جموں و کشمیرآ غاضبانہ کوزہ کرے، دا ہمو تہار دے ءِ ہراتم بھارت کشمیری الس ءِ محکوم کننگ کن تینا فوج ءِ کشمیر اٹ شیف کرے۔ بنجائی وزیر بیست ءُ ہفت اکتوبر تہاردے انا وخت آ جاری کروک آ تینا کلہو اٹی پارینے کہ بہادر کشمیریک تدوک آ ہفت دہائی آن زیات وخت آن بھارتی ظلم و جور و استبداد و ریاستی دہشت گردی تون مون تننگ ءُ و تینا حق خودارادیت نا دوئی کننگ کن عظیم جہد کننگ ءُ، بھارت 5 اگست 2019ء آ اسہ کنڈی و غیر کانودی گام گیج آتے اٹ غیرکانودی وڑاٹ تینا کوزہ ٹی جھیڑہ ئی علاقہ نا حیثیت اٹی بدلی اتنگ نا سازش کرے و ہنداوڑ جہانی کانود، اقوام متحدہ نا سلامتی کونسل نا قرارداد و ہڑتوم آ کنڈآتا معاہدہ غاتے لتاڑا۔ 5 اگست 2019ء آن پد فسطائی و انتہاپسند مودی حکومت غیر کانودی وڑاٹ تینا کوزہ ٹی جموں و کشمیر نا الس آ ظلم و جور انا اسہ پوسکن ءُ تہار ءُ نن اس مسلط کرے۔ سینیٹر شبلی فراز پارے کہ اسہ سال آن زیات وخت آن جاری کرفیو مقبوضہ ڈیہہ نا کشمیری تیان دنیا نا رابطہ ءِ کشکا۔ وادی جنت نظیر اینو زندان اس جوڑ مسنے، پورو بلیک آؤٹ ءِ، ہڑدے ئی کنوئی آ گڑاتا کاختی ءِ و دوائی و درمان میسر اف، کودک و کم سن چناک گھیڑ و قیدوبند انا صعوبت ءِ سگنگ ءُ۔ اوپارے کہ کوزہ گیر بھارتی فوج کشمیری تا بنداوی انسانی حق ءِ نت تا کیرغ اٹ لتاڑنگ ءِ، ورناتے بہیمانہ بیدادی نا شست کننگ انگ ءِ، عدالت آن ایڑتر زوال کروک آتیٹی ودکی مسنے و سیاسی سرکڑدہ غاک بندی ءُ۔ اوپارے کہ وزیراعظم عمران خان دنیا نا غٹ آن بھلا فورم آ دُوارہ مظلوم کشمیری تا مقدمہ ءِ پورو واک اتون پیش کرینے۔ اوکشمیری تا روا و کانودی حق انا پبی وڑاٹ ترجمانی و وکالت نا فرض ءِ ادا کرے۔ اوپارے کہ پاکستان ہر فورم آ کشمیری تیا کروک آ بھارتی بیدادی ءِ پاش و اوفتا بنداوی حق انا رکھ اکن توار بڑز کرسا کیک۔ نن کشمیری ایڑھ ایلم تا پبی سیاسی، سفارتی و اخلاقی مخ تفی ءِ آجوئی نا دے دے ٹک تننگ اسکان برجاتخنہ۔
