پشاور۔ 27 اکتوبر (اے پی پی) پشاور نا رنگ روڈ آ واقعہ دیر کالونی نا مدرسہ ٹی بارودی مواد آتا دھماکہ ٹی 7 چنا شہید و مدرسہ نا چناتتون اوار 70 بندغ ٹھپی مسر، لیڈی ریڈنگ ہسپتال نا انتظامیہ ہسپتال اٹی 7 چناتا لاش و 70 ٹھپی تا اتنگ ءِ پک کرینے ہرافتیان چندی تا حالیت نازرک پاننگانے، ٹھپی مروک آتیٹی زیات کچ کم وئی چناتا ءِ ہرافتیان چندی تا حالیت نازرک ءِ، پولیس کمامدارآتارداٹ دیر کالونی نا مدرسہ ٹی ہرا ’’سپین جماعت‘‘ (سفید مسجد) پنی آ مسیت نا بشخ ءِ ٹی سہب انا نماز آن پد خوان و خوانفنگ نا چرجوئی برجائس کہ سہب انا ہشت بجہ غا اسہ بندغ اس بیگ اتون مدرسہ نا دنگ اٹ پترینگا و بیگ ءِ تخنگ آن پد گم مس اوڑآن دمدستی پد دھماکہ مس و ہرکنڈآ تباہی تالان مس۔ دھماکہ غان پد ریسکیو 1122 و پولیس نا ٹیمک واقعہ نا جاگہ غا سرمسر ہرافک ہندی مخلوق نا کمک اٹ ٹھپی و لاش آتے ہسپتال آ گدریفیر، ایس پی سٹی وقار احمد نا رداٹ دھماکہ آئی ای ڈی بلاسٹ اس ئس و بنائی شاہدیک پاننگ ءُ کہ داٹی بڑزکو کوالٹی نا 5 آن 6 کلوبارودی مواد ہرافتے ٹی بال بیرنگ ہم اوار ئسر کاریم اٹ اتنگا، اوپارے کہ بنائی شاہدیک داہم پاننگ ءُ کہ دھماکہ ٹائم ڈیوائس اٹ کننگا۔ صوبائی وزیر شوکت یوسفزئی نا رداٹ دہشت گرد آک مدرسہ ءِ اسہ سافٹ ٹارگٹ اس ہرسا تینا ناپاک عزم انا پوروی نا کوشست کریر ہرانا اخس کہ مذمت ءِ کننگے کم ءِ۔ اوپارے کہ پشاور اٹی پولیس و سیکورٹی ادارہ غاک پورو وڑاٹ الرٹ ءُ۔ دھماکہ نا جاست وپاست برجاءِ و داٹی اوار زموار آتے اوفتے اوفتا کروک نا سزا تننگک، سی سی پی او پشاور محمد علی خان زہمی مسیت و مدرسہ نا دورہ ءِ کننگ نا وخت آ صحافی تتون گپ وتران اٹی پارے کہ مدرسہ نا بابت خاص ءُ تھریٹ اس الوکہ، جاست وپاست بنائی مرحلہ غاتیٹی ءِ ہر پلوآن جاست وپاست کننگ انگ ءِ، اے آئی جی بمب ڈسپوزل شفقت ملک نا رداٹ دھماکہ بند حال اٹی مس و ٹائم ڈیوائس نا دھماکہ ئس ہرا کم و ود 5 کلو بارودی مواد آتیا تالان ئس، اوپارے کہ دھماکہ دُن تو ہال انا نیام اٹ مس ہنداخاطرآن نسخان زیات مس۔
