اسلام آباد۔ 27 اکتوبر (اے پی پی) بنجائی وزیر داخلہ اعجاز احمد شاہ پارینے کہ اینو نادے کشمیری ایلم تیا کوزہ گیر مرسا بھارت ظلم انا داستان نا بناءِ کرے و اوفک 73 سال آن تینا حق اکن جنگ تننگ ءُ، لکھ آ کشمیری تے تینا اُراتیٹی بندی کننگانے، اینو دنیا نا مون آ ہندوستان نا اصلی دروشم پاش مسنے، وزیراعظم عمران خان بطور سفیر کشمیری تا مقدمہ تون مون تننگ ءِ۔ سے شنبے نادے آ کشمیر نا تہاردے انا وخت آ وزیر داخلہ اعجاز احمد شاہ تینا کلہو اٹی پارے کہ اینو نادے کشمیری ایلم تیا کوزہ گیر مرسا بھارت ظلم انا داستان نا بناءِ کرے و اوفک 73 سال آن تینا حق اکن جنگ تننگ ءُ۔ بھارت کشمیری تے اوفتا علاقہ غاتیٹی اقلیت کننگ خواہک۔ لکھ آ کشمیری تے تینا اُراتیٹی بندی کننگانے۔ اینو ای اسہ وار ولدا آزاد کشمیر و مقبوضہ کشمیر آن تعلق تخوک آ غٹ کشمیری تے، باور کرفنگ خواوہ کہ نم تنیا افیرے۔ ای سلام پیش کیوہ غٹ کشمیری تے کہ اوفک ظلم انا مون آ تینے شیف توتوس و اینو 73 سال گدرینگ انگ آن پد ہم تینا حق اکن توار چست کننگ ءُ۔ اوپارے کہ ہر پاکستانی نم تون ہم کوپہ سلوک ءِ ننے نما تکلیف آتا احساس ارے۔ مقبوضہ کشمیر اٹی برجا انسانی حق انا خلاف ورزی و کودک کشمیری تیا کروک آ بیدادی ءِ جہانی کہول آ انصاف نا دوئی کننگ اسکان تالان کرسا کینہ۔ اینو دنیا نا مون آ ہندوستان نا اصلی دروشم پاش مسنے۔ اعجاز احمد شاہ پارے کہ 5 اگست 2019 و اوکان پد مروک آ گام گیج بھارت نا آرایس ایس و فاشٹ ایجنڈا نا ڈیک ءِ ایتک۔ تاریخ گواہ ءِ کہ آرایس ایس آن ہلیس واجپائی و ولدا گجرات بیدادی آن مودی نا غٹ گام گیج آک اسہ مہم اسے نا رداٹ کننگار و بھارت نا سیکیولر ڈرامہ ہم پاش مسنے۔ اوپارے کہ وزیراعظم عمران خان بطور سفیر کشمیری تا مقدمہ تون مون تننگ ءِ۔ اواقوام متحدہ ٹی ہراوڑ کشمیری تیکن توار ہرفے اونا درور ملیپک۔ نن آخیریکو دم اسکان تینا کشمیری ایلم تا توار مرینہ۔ اوپارے کہ مچ آپاکستانی قوم تینا کشمیری ایلم تتون سلوک ءُ انشاء اللہ نن سرسہب مرینہ و کشمیریک آجوئی نا چاگڑد اٹ ساہ ہلنگ کیرہ۔ مودی ءِ اینو کلہو تننگ خواوہ کہ اگہ نا ظلم و جور اٹ کشمیری تا حوصلہ شیف مسکہ تو اینو بھارت ءِ کرفیو نا سیبوءِ ہلوئی تمتوکہ و دا کہ او تینا ناپاک عزم اٹ اسُل سرسہب مفک۔
