صدر مملکت ڈاکٹرعارف علوی نا کشمیر اٹی تہار دے انا وخت آ کلہو

اسلام آباد۔ 27اکتوبر(اے پی پی) صدر مملکت ڈاکٹر عارف علوی پارینے کہ کشمیری الس نا حق پرست جہد اٹی اوفتا بدل مفروک مخ تفی نا عزم انا درشانی ءِ کینہ، بھارت نا غیر انسانی گام گیج، وحشیانہ جبر’’ہندوتوا‘‘ آرایس ایس۔بی جے پی حکومت نا انتہاپسندانہ دروشم ءِ پاش کرینے، بھارت نا گام گیج آک جہانی کانود، سلامتی کونسل نا قرارداد و کشمیری تتون بھارتی قول آتا خلاف ورزی ءِ، کشمیریک اسہ سال آن زیات وخت آن تینا اُراتیٹی بند ءُ۔ بھارتی بیدادی نا است ہسون و ریاستی دہشت گردی آن پد ہم کشمیری الس تینا حق ارادیت نا دوئی کننگ کن سنبرینگوک ءُ۔ صدر مملکت ڈاکٹر عارف علوی کشمیر اٹی تہار دے انا وخت آ تینا کلہو اٹی پارے کہ 73 سال مست اینو نادے بھارتی فوج جہانی کانود و انسانی اصول آتا خلاف ورزی ءِ کرسا سرینگر اٹ شیف مس، تدوک آ سال 5 اگست آ بھارت مقبوضہ جموں و کشمیر نا متنازعہ حیثیت و اونا آبادیاتی پنجر ءِ بدل کننگ کن گام ہرفے، بھارت نا غیر کانودی و اسہ کنڈی گام گیج آتے کشمیری الس، پاکستان و جہانی برادری مسترد کریر۔ اوپارے کہ بھارت نا گام گیج جہانی کانود، سلامتی کونسل نا قرارداد و کشمیری تتون بھارتی وعدہ غاتا خلاف ورزی ءِ، کشمیری اسہ سال آن زیات وخت آن تینا اُراتیٹی بند ءُ۔ صدر عارف علوی پارے کہ کشمیریک تینا ڈغار آ درملکی و تینا روڈ آتیا آجو وڑاٹ چرینگ انگ نا قابل افس، 80 لکھ کشمیری تیا 9 لکھ آن زیات کوزہ گیر فوج مقبوضہ علاقہ ءِ دنیا نا غٹ آن بھلا زندان جوڑ کرینے۔ اوپارے کہ بھارت نا غیر انسانی گام گیج، وحشیانہ جبر’’ہندوتوا‘‘ آرایس ایس بی جے پی حکومت نا انتہاپسندانہ دروشم ءِ پاش کرینے۔ بھارتی بیدادی نا ہولناک و ریاستی دہشت گردی آن پد ہم کشمیری الس سنبرینگوک ءِ، کشمیری الس پک کرے کہ بھارت واک اٹ کشمیری تا عزم ءِ توننگ کپک۔ اوپارے کہ کشمیری ایلم و ایڑھ تا قربانی و ناقابل تسخیر جوزہ ءِ سلام پیش کینہ، کشمیری الس نا حق پرست جہد اٹ اوفتا بدل مفروک مخ تفی نا عزم انا درشانی ءِ کینہ۔ اقوام متحدہ نا قرارداد آتا رداٹ کشمیری تا حق خودارادیت نا دوئی کننگ اسکان اوفتا مخ تفی ءِ برجاتخنہ۔