اسلاموفوبیا نا باندات ءِ او آئی سی نا پلیٹ فارم آ ہرفنگک، کشمیری الس نا مخ تفی ءِ برجاتخنہ، وزیر خارجہ شاہ محمودقریشی

اسلام آباد۔ 27 اکتوبر (اے پی پی) وزیرخارجہ مخدوم شاہ محمود قریشی پارینے کہ اگہ ہولوکاسٹ نا بابت مواد آتا تشہیر ءِ توننگ مریک تو اسلام نا برخلاف توہین آمیز مواد آتیا ہم پابندی خلنگ مریک۔ پاکستان حق خودارادیت نا دوئی کننگ اسکان کشمیری الس نا مخ تفی ءِ برجاتخک۔ سے شنبے نادے آ تہاردے و گستاخانہ خاکہ غاتا بابت وزیر خارجہ اسہ بیان اسے ٹی پارینے کہ نن کس اسے نا حب الوطنی آ شک کپننگ اُن و نئے ننے کس اسے حب الوطنی نا سرٹیفکیٹ جاری کروئی ءِ، غٹ پاکستانیک محترم و حب الوطن ءُ ولے اینو منہ نادان سیاست دان ہرا بولی ءِ کاریم اٹ اتنگ ءُ و ہرا ریاست مخالف بیانیہ، اوفتا پلیٹ فارم آن تننگ انگ ءِ ، داڑآن قومی فائدہ غاتے نسخان رسینگ انگ ءِ۔ اوفتے دا روش ءِ بدل کروئی مریک ہندا جوزہ و خیال آتا درشانی ءِ ای درو قومی اسمبلی نا دیوان اٹی کریسٹ۔ اینو نئے بیرہ پاکستان اٹی بلکن مچ آ دنیا ٹی کشمیریک برانز دے ءِ اڈتننگ ءُ۔ اینو نادے 27 اکتوبر 1947ء آ بھارت ناروا وڑاٹ، درواٹ کشمیر نا گل زمین آ کوزہ کرے و او کوزہ اینو اسکان برجاءِ، بھارت، تینا وعدہ و سیکورٹی کونسل نا قرارداد آتیان انحراف کرے ہراڑآن کشمیری تیٹی اضطراب ودی مس و اینو اسکان کشمیریک، دا ناروا کوزہ نا برخلاف سراپا احتجاج ءُ۔ وزیر خارجہ پارے کہ 5 اگست نا گام گیج آن پد دا برانز اٹ پین شدت بسنے انتئے کہ ہندن ءُ کانود اتنگا ہراڑآن آبادیاتی تناسب اٹ بدلی کرسا مسلم گیشتری ءِ اقلیت اٹ بدل کننگ مرے ہرادے کشمیریک ہچ ءُ حالیت اسے ٹی امنا کپسہ۔ اوپارے کہ فرانس اٹی گستاخانہ خاکہ غاتا بابت مچ آ دنیا نا مسلمان تتون اوار اوار، پاکستان اٹی ہم شدید غم و غصہ ءِ۔