وزیر خارجہ مخدوم شاہ محمود قریشی نا 27 اکتوبر آ تہاردے انا وخت انا رداٹ کلہو

اسلام آباد۔ 27اکتوبر (اے پی پی) وزیر خارجہ مخدوم شاہ محمود قریشی پارینے کہ اقوام متحدہ و مہذب دنیا کشمیری تے اوفتا روا، کانودی و جمہوری حق ترفنگ کن عملی گام گیج کیر، جموں و کشمیر اسہ مسلمہ متنازعہ علاقہ سے ہرانا ایسری اقوام متحدہ نا سلامتی کونسل نا قرارداد آتا رداٹ کشمیری تے استصواب رائے نا حق تننگ اٹ اودیم ءِ۔ وزیر خارجہ 27 اکتوبر آ تہاردے انا وخت آ تینا کلہو اٹی پارینے کہ وزیراعظم عمران خان دنیا نا غٹ آن بھلا فورم آ دُوارہ مظلوم کشمیری تا مقدمہ ءِ پورو واک اتون پیش کرینے، اوکشمیری تا روا و کانودی حق انا پبی وڑاٹ ترجمانی و وکالت نا فرض ءِ ادا کرینے و داسہ دا اقوام عالم نا زمواری ءِ کہ او مظلوم کشمیری تا حق اٹی توار ءِ بڑزکیر و بھارت ءِ اونا اصل مکروہ دروشم ءِ نشان ایتر۔ اوپارے کہ پاکستان ہر فورم آ کشمیری تیا کروک آ بھارتی ظلم ءِ پاش کننگ و اوفتا بنداوی حق انا رکھ اکن توار بڑز کرسا کیک۔ اوپارے کہ بھارت 27 اکتوبر 1947ء آ تقسیم برصغیر نا فارمولہ نا خلاف ورزی ءِ کرسا جموں و کشمیر اٹی تینا فوجی تے شیف کرسا توفک نا زور آ ناروا کوزہ کریسس و ہرسال بیست ءُ ہفت اکتوبر آ پاکستان اٹی تہاردے اڈتننگ نا مسخت جہانی برادری ءِ دا کلہو تننگ ءِ کہ نن مقبوضہ جموں و کشمیر آ غیر کانودی بھارتی کوزہ گیری ءِ مسترد کینہ و نن ہچ ءُ حالیت اسے ٹی مظلوم کشمیری تا روا حق آن اسہ اینچ اس ہم پدی مفنہ، نن کشمیری ایڑھ ایلم تا پبی سیاسی، سفارتی و اخلاقی مخ تفی ءِ آجوئی نا دے دے ٹک تننگ اسکان برجاتخنہ۔ اوپارے کہ بھارت 5 اگست 2019 آ اسہ کنڈی و غیر کانودی گام گیج آتیان غیر کانودی وڑاٹ مقبوضہ کشمیر نا حیثیت اٹ بدلی اتنگ نا سازش کرے و ہنداوڑ جہانی کانود، اقوام متحدہ نا سلامتی کونسل نا قرارداد و ہڑتوم آ کنڈآتا معاہدہ غاتے لتاڑا۔ ہرافتا ادراک ءِ جہانی ادارہ و اقوام عالم ءِ کروئی مریک۔ وزیر خارجہ پارے کہ بھارت دا جوان چائے کہ ظلم و جور کشمیری تے اوفتا خودارادیت نا حق انا مزل آن مُر کننگ کپک۔ اوپارے کہ پاکستان ہر فورم آ کشمیری تیا کروک آ بھارتی بیدادی ءِ بے نقاب و اوفتا بنداوی حق انا رکھ اکن توار بڑز کرسا کیک۔