کیلفورنیا۔ 27 اکتوبر (اے پی پی) سوشل میڈیا نا پنی آ پلیٹ فارم فیس بک نا کنڈآن جوڑکروک چاروکی بورڈ فیس بک و انسٹاگرام آن جھیڑہ ئی مواد آتا اسہ کنڈ کننگ یا دا مواد آتے دا پلیٹ فارم تیا برقرار تخنگ نا باندات آتا جاچ ءِ ہلنگ کن کاریم نا بناءِ کرینے۔ داہیت انا پڑو ءِ فیس بک نا چاروکی بورڈ تینا ویب سائٹ آ جاری اسہ بیان اسے ٹی کرینے۔ ہرانا رداٹ اگہ فیس بک نا صارف اسے نا مواد آتے فیس بک یا انسٹاگرام آن اینک کننگک و فیس بک آن کروک آ اپیل نا عمل ہم پورو مسنے، تو فیس بک صارف دا فیصلہ نا برخلاف و سائٹ بورڈ یا چاروکی بورڈ آن خواست کننگ کیک۔ ہنداوڑ فیس بک مواد آتا بارواٹی فیصلہ ہلنگ کن ہندا چاروکی بورڈ اتون رجوع کننگ کیک کہ آیا مواد آک فیس بک آ مریر یا اوفتے اینک کننگے۔ فیس بک اینخو سال مئی ٹی چاروکی بورڈ اس جوڑ کریسس ہراڑکن دنیا نا چندی ملک آتیان 20 باسک آتے گچین کننگاسس۔ فیس بک نا چاروکی بورڈ فیس بک و انسٹاگرام آ شینک یا پوسٹ مروک آ ہر مواد نا بارواٹی فیصلہ کننگ نا مجاز مریک کہ آیا دا مواد آک فیس بک یا انسٹاگرام آساڑی مریر یا اوفتے اینک کننگے۔ فیس بک نا چاروکی بورڈ بنائی وڑاٹ 20 باسک آتیا تالان ءِ ہراٹی انٹرنیٹ صارف آتا حق انا بابت غیر سرکاری ادارہ ڈیجیٹل رائٹس فاؤنڈیشن نا سروک نگہت داد ہم اوار ءِ۔راجی میڈیا نا صارف آتا حق انا رکھ اکن سرگرم کارندہ غاک فیس بک چاروکی بورڈ انا آپریشنل مننگ ءِ ستاکڑزوک گوندانو۔
