لاہور۔ 27 اکتوبر (اے پی پی) خاتون اول بیگم ثمینہ علوی سے شنبے نادے آ خصوصی چناتا ادارہ گورنمنٹ شاداب ٹریننگ انسٹیٹیوٹ لاہور نا دورہ ءِ کرے و داڑے چناتے تروک آ ساڑی آسراتی تا بارواٹ اَرفے۔ ادارہ نا خصوصی چناتا کنڈآن اونا بننگ آ پھل آتا گل دستہ پیش کننگا۔ اوادارہ نا چندی بشخ ماڈل گروپ، سیکنڈری گروپ، آٹسٹک گروپ و پرنسپل آفس نا دورہ ءِ کرے۔ خاتون اول ادارہ ٹی خصوصی چناتا کنڈآن خلوک آ ہینڈی کرافٹ نا چندی اسٹال تا دورہ ءِ ہم کرے۔ داوخت آ او خصوصی چناتا جوڑ کروک آ اسہ پینٹنگ اسے نا ستاءِ کرسا چناتے محنت نا پنت و شون کرے و اوفتا کاریم نا سفت ءِ کرے۔ داوخت آ چناتا کنڈآن خصوصی ڈانس پیش کننگا وخت اس کہ اسکاؤٹس ٹیم خاتون اول ءِ سلامی پیش کرے۔ خاتون اول اسکول اٹی نیال اس ہم خلک و اودے شون ہلنگ کن دعا کرے۔ داکان مست ادارہ ناڈائریکٹر جنرل خاتون اول ءِ ادارہ نا چندی بشخ آتا بارواٹ حوال تس و خصوصی چناتیکن پین کروک آ گام گیج آتا سرجم بارواٹ معلومدار کرے۔
