سکھر۔ 26 اکتوبر (اے پی پی) صدر مملکت ڈاکٹر عارف علوی پارینے کہ وزیراعظم عمران خان نا کماشی ٹی بنجائی حکومت کرپشن نا چٹفنگ و ملک ءِ شونداری نا کسر آ روان کرینے، ملک اٹ زرگزران ءِ گچین کننگ کن کاریم کننگ انگ ءِ۔ داخیال آتا درشانی ءِ او دوشنبے نادے آ سکھر سرکٹ ہاؤس اٹی پاکستان تحریک انصاف سکھر و لاڑکانہ ڈویژن نا راہشون تیا تالان ڈل اسے تون اوڑدہی ٹی گپ وتران کرسا کرے۔ داوخت آ گورنر سندھ عمران اسماعیل، پارٹی نا ایم این ایز و ایم پی ایز آک ہم ساڑی ئسر۔ ڈل اتون گپ وتران کرسا صدر مملکت پارے کہ کشاری بشخ ءِ مون آ دننگ پاکستان تحریک انصاف نا اولیت آتیٹی اوار ءِ۔ و کشاری بشخ ءِ سوگو کننگ نا چرجوئی ٹی حکومت بزغرآتے شونہال کننگ کن ہروڑنا گام گیج کننگ ءِ۔ اوپارے کہ حکومت ملک انا 14.9 ملین بندغ آتے احساس پروگرام نا رداٹ فی کس 12 ہزار روپئی تننگ ءِ۔ داوخت آ صدر مملکت ڈاکٹر عارف علوی کورونا دین انا مون ءِ توننگ نا چرجوئی ٹی حکومت نا کوشست آتا ستاءِ کرسا پارے کہ ناجوڑی نا تالانی نا بنائی دے تیٹی بھاز خلیس تالان ئس، گڑتی ئس کہ بھاز بھلو کچ اسے ٹی مرک آک مریرہ ولے حکومت دا خلیس نا مون ءِ تورے۔ ہندن ءُ سرسہب حکمت عملی اس اختیار کننگا ہرانا اعتراف ءِ جاپان و فلپائن نا حکومت آک کریر و ننا کاٹم گمر اٹ بڑزا مس۔ دا باندات آ صدر مملکت پارے کہ کورونا دین انا بابت گچین حکمت عملی اس اختیار کننگ کن وزیراعظم عمران خان، این سی او سی، ڈاکٹرز و پیرامیڈیکل اسٹاف نا کڑد بے مٹ مسنے۔ داوخت آ پاکستان تحریک انصاف نا راہشونک صدر مملکت ءِ تینا حلقہ غاتا ویل آتا بارواٹ معلومدار کریر۔ دا چرجوئی ٹی صدر مملکت گورنر سندھ ءِ پارت کرے کہ ہندن ءُ وڑوڈول اس اختیار کننگے ہرانا رداٹ ویل آک ایسر مرسا کیر۔ دا چرجوئی ٹی صوبائی حکومت تون رابطہ کننگے تانکہ الس نا ویل آک اولیتی بنداو تیا ایسر مریر۔
