اسلام آباد۔ 26 اکتوبر (اے پی پی) وزیر خارجہ شاہ محمود قریشی گستاخانہ خاکہ غاتا بابت پارینے کہ اقوام متحدہ دمدستی اسلام نا برخلاف دا خارتس بیانیہ نا نوٹس ءِ ہلسا پبی گام گیج کے۔ نن اینو (دوشنبےنادے آ) پاکستان اٹ تعینات فرانس نا سفیر ءِ دفترخارجہ غا بٹنگانن۔ نن اوڑتون ہم برانز کینہ۔ دوشنبے نادے آ تینا بیان اٹی وزیر خارجہ پارے کہ گستاخانہ خاکہ غاتیان مچ آ دنیا ٹی غم و غصہ ءِ۔ فرانس نا صدر نا غیر زموارانہ بیان آک لگوک آ خاخرآ تیل شاغنگ نا کاریم ءِ کرینے۔ اوپارے کہ خار آ مبنی بیانیہ غاتیٹی ہڑدے ودکی مننگ ءِ۔ کس ءِ حق مفک کہ او آجوئی سلاہ درشانی نا آڑاٹ مچ آ دنیا نا کروڑ آ مسلمان تا است آزاری ءِ کے۔ وزیر خارجہ پارے کہ دااولیکو وار متنے۔ منہ وخت مست چارلی ہیبڈو گستاخانہ خاکہ شینک کرے ہراڑآ ہر پاکستانی ترند برانز کرے و سخت لوز آتیٹی مذمت کریر۔ وخت اس قرآن پاک ءِ ہُشنگ نا واقعہ غاک مون آ بریرہ۔ وزیراعظم اینخو نا سال اقوام متحدہ جنرل اسمبلی نا دیوان اٹی اسلام نا برخلاف خارتس بیانیہ و اسلاموفوبیا نا برخلاف توار بڑز کرے۔ وزیر خارجہ پارے کہ ہراوڑنمے سما ءِ کہ وزیراعظم عمران خان فیس بک نا بانی مارک زکربرگ آن ہم خواست کرینے کہ ہراوڑنی ہولوکاسٹ آ مبنی مواد آتے شینک کپیسہ ہمووڑ اسلام نا برخلاف گستاخانہ مواد آتا شینک کننگ ءِ ہم توننگے۔ اوپارے کہ او آئی سی نا وزیر خارجہ غاتا بروک آ دیوان اٹی، ای وزیراعظم نا پارت آ دا بابت اسہ جامع قرارداد اس پیش کیوہ ہراٹی 15 مارچ نادے، اسلاموفوبیا نا برخلاف جہانی دے انا وڑاٹ طے کننگ نا سلاہ ایتنہ۔ ای سمجھیوہ کہ اقوام متحدہ ءِ مرے کہ دمدستی اسلام نا برخلاف دا خارتس بیانیہ نا نوٹس ءِ ہلے و پبی گام گیج کے۔ اینو ہرا خار انا بج ءِ دسنگ انگ ءِ اونا بھرمک شدید مریرہ متشدد رویہ غاتیٹی ودکی مریک۔ داڑآن راج پین تقسیم مریک۔ شاہ محمود قریشی پارے کہ نن اینو(دوشنبے نادے) آ پاکستان اٹ تعینات فرانس نا سفیر ءِ دفترخارجہ غا بٹنگانن، نن اوڑتون ہم برانز کینہ۔
