اسلام آباد۔ 26 اکتوبر (اے پی پی) اسپیکر قومی اسمبلی اسد قیصر پارینے کہ اوغان امن عمل و مذاکرات نا نئے بیرہ پاکستان نا حکومت بلکن جہانی برادری ہم ستاءِ کرینے، دا عمل ءِ بھاز احتیاط اٹ ایسر اسکان سرکننگ نا گرج ءِ، تاریخ نا سبخ ننے مون آ ہِننگ و تینا غلطی تے سہی کننگ نا رغامک، پاکستان و اوغانستان تین پہ تین اواری اٹ بحیرہ عرب ءِ نیامی ایشیائی ریاست آتے اسہ ایلو تون ملفنگ کن کڑد ادا کیر، داڑآن ہڑتوم آ ملک آتا الس کن اقتصادی شونداری و شونہالی نا اسہ پوسکن ءُ دور اس بناکیک۔ او دوشنبے نادے آ داڑے پاک۔ اوغان واپار و زرکاری نا چرجوئی ٹی اڈ ہلوک آ اِرادے ئی فورم نا بنائی دود آن تران کریکہ۔ اسپیکر پارے کہ غٹ آن اہم ہیت دادے کہ پاکستان و اوغانستان ءِ اسیجائی باندات آتا ایسری کن مفاہمت و ہم آہنگی نا کسر پٹوئی مریک۔ غٹ ویل آتے قومی و حکومتی نظریہ غان سرپند کننگ مفک۔ داڑکن ننے غٹ ءِ اواری اٹ وخت انا جہانی آزمائشت خاص وڑاٹ نیزگاری و نزوری کن اسہ متحد محاذ اس ٹہیفنگ کینہ۔ اوپارے کہ پاکستان و اوغانستان اسہ ایلو نا شریدار ءُ۔ اسہ وخت اس ئس ہراتم ہڑتوم آملک آتا نیام اٹ واپار نا کچ 2.5 ارب ڈالر ئس ولے کیہی سال آن داٹی پدریسہ کمتی مس ولے کورونا دین انا حالیت آتا سوب آن داٹی نمان کمتی مس انتئے کہ صنعتی ادارہ غاک کیہی تُو اسکان بند مسر۔ داسہ دااڑاند آتے چٹفنگ، پوریاگر و صنعت کار آتے آسراتی فراوان کننگ آن واپار نا کچ ءِ گچین کننگ تون اوار اوار داڑآن نیزگاری نا چٹفنگ و راجی شونداری ٹی کمک رسینگک۔ خاص وڑاٹ سیمی علاقہ غاتیٹی روزگار نا وارخواہی فراوان کننگ آن ہڑتوم آ ملک آتا الس نا زند انا وڑاٹی گچینی بریک۔ اوپارے کہ السی کہول آ رابطہ غاتیٹی ودکی کن پوریاگر آتا است بڈی، ٹرانزٹ ٹریڈ، ٹیرف نا اڑاند آتے کم کننگ کن پاک اوغان پارلیمانی فرینڈ شپ نا پروگرام اس جوڑ کننگا۔ داڑآن پت اٹ ودکی، ہڑتوم آ کنڈآتا واپار و اقتصادی تعلقداری ٹی گچینی بریک نیز پارلیمانی کمیٹی ویزہ شڑت، سیمی باندات آتیٹی آسانی و اختہ مروک آ کنٹینرآتا سکیننگ کن ہم ٹاسک فورس اس ٹہیفینن۔ داتم اسکان کمیٹی نا 15 آن زیات دیوان اڈ ہلکونے۔ اسہ وخت اس ئس کہ ہراتم 11 ہزار کنٹینر اختہ ئسر۔ اینو دا کچ اسہ ہزار آن کم ءِ۔ نن بارڈر آ ٹریفک روانی ءِ گچین کرین۔ اوپارے کہ اولیکو بندرگاہ آن اوغان ٹرانزٹ ٹریڈ نا کنٹینر 28 دے اٹی اوغانستان آسرمسکہ ولے داسہ حکومتی و پارلیمانی کوشست آتا سوب آن دا کنٹینر آ عمل 3 آن 5 دے اٹی پورو مریک۔ اوغان ٹرانزٹ ٹریڈ اکن بارڈر آ 3 ہند آتیا ملنگ انگ ءِ۔ اوپارے کہ سوگو پارلیمانی و برادرانہ تعلقداری تا درشانی ءِ۔ داڑآن طالب علم، ناجوڑ و پوریا گر آتے فائدہ مریک۔ دا کوشست آتیان اوغانستان تون زرگزرانی و راجی تعلقداری گچین مریک۔ اوپارے کہ پاک اوغان ٹرانزٹ ٹریڈ کن ٹاسک فورس انا مد 2021ء ٹی چٹنگ ءِ۔ کمیٹی ٹاسک فورس اکن ہڑتوم آ کنڈآتا پورویاگر آتون اوار غٹ کڑدہ غاتیان سلاہ ہلنگ نا گرج ءِ۔ اوپارے کہ پاکستان اوغانستان تون تین پہ تینی واپار، ایلمی و تین پہ تینی تعلقداری تے پین ودفنگ نا عزم انا درشانی ءِ کیک۔ اوپارے کہ پاکستان و اوغانستان نا نیام اٹ پرامن اقتصادی کمکاری نا کمک اٹ بحریہ عرب ءِ نیامی ایشیائی تون ملفنگ اٹ ہم کمک رسینگک۔ داڑآن ہڑتوم آ ملک آتا الس کن روزگار نا وارخواہی تیٹی ہم ودکی مریک۔او دا کانفرنس نا اڈتننگ کن یو ایس ایڈ تون اوار ایلو ادارہ و شخصیت آتا منت واری ءِ ہرفے۔
