اسلام آباد۔24اکتوبر (اے پی پی): بنجاھی وزیر اھوالکاری ءُ شنگ کاری سینیٹر شبلی فراز ءَ گوشت کہ کیپٹن (ر) صفدر اعوان ءِ دزگیری سندھ ءِ جیڈھ ءِ بوتگ پیپلز پارٹی ایشرا بنجاھ ءِ جیڈھ ءِ جوڑ کنگ ءِ کوشست ءَ کنگ ءَ انت، واکیہ کراچی ءَ بوتگ دزگیری ءِ زمہ واری چوں ءُ چتور بنجاھ ءِ سر ءَ لڈگ بیت، اے رنگیں جاور ھال آنی تہ ءَ اولی زمہ واری صوبائی حکومت ءِ سر ءَ لڈگ بیت۔ کراچی ءَ چہ اگاں کسے بیگواہ بیت گڈا صوبائی حکومت پسو بہ دنت آئی زمہ واری انت، ھمک جیڈھ ءَ را بنجاھ ءُ یا ادارگ آناں زمہ وار نامینگ شریں گپ ءِ نہ ات، شمبے ءِ روچ ءَ جندی ٹی وی چینل ءِ پروگرام ءَ گوں تران کنا ن ءَ آئی ءَ گوشت کہ حکومت الس ءِ گہبود ءُ ملک ءِ دیمروئی ءُ وشھالی ءِ واستہ ھمک رنگیں گامگیج چست کنگ ءَ انت، حکومت لس مردم ءِ ریلیف پجاری کنگ ءِ واستہ گران بھائی کنگ ءَ ھوار توامیں السی جیڈھ آنی گیواری ءِ سر ءَ کار کنگ ءَ انت ءُ ھمروچگیں وردن ءُ وراک ءِ نیاد آنی تہ ءَ کمی ءِ واستہ کار رپک سہرا کتگ۔ بنجاھی وزیر ا ھوالکاری ءُ شنگ کاری ءَ گوشت کہ اپوزیشن گل وتی لٹ ءُ پُل ءِ چیر دیگ ءِ واستہ ملک ءَ نہ وشیں جاور پیداک کنگ ءِ کوشت ءَ انت بلے اے مردم وتی سیاسی مول ءُ مراد آناں کامیات بوھگ ءَ نئیل انت۔ بنجاھی وزیر اھوالکاری ءُ شنگ کاری ءَ گوشت کہ ن لیگ ءُ پیپلز پارٹی ءِ سروک وتی دور ءُ باریگ ءَ مزنیں کساس ءَ لٹ ءُ پُل ءَ گوں دست مانجن انت، الس ءَ پاکستان تحریک انصاف (پی ٹی آئی) حکومت ءَ لٹ ءُ پُل کنوک آنی ھلاپ ءَ کیاسگری ءِ مینڈیٹ داتگ ءُ حکومت کیاسگری ءِکار ءَ اچ رنگیں نرمی نہ کنت۔
