اسلام آباد۔23اکتوبر (اے پی پی): وزیر ءِ درئی کار شاہ محمود قریشی ءَ گوشت کہ یونائیٹڈ نیشن یک ٹوھیں کارگس ات، ایش میاں اوستمانی دگنیا ءِ الس ءِ یک مشتی ءِ آدینک انت، یک مردمی لیکہ ءُ زینو فوبیا وڑیں ھوپ سر چست کنگ ءَ انت۔ اے جاور آنی تہ ءَ یونائیٹڈ نیشن ءِ چارٹر ءِ پد ءُ رندی کنگ لوٹ ایت۔ اے گپ آئی ءَ آدینگ ءِ روچ ءَ وزارت ءِ درئی کار ءَ یونائیٹڈ نیشن ءِ 75 ھپتاد ءُ پنچمی سالروچ ءِ درگت ءَ برجم داشتگیں ھاسیں دیوان ءَ گوں گشتانک دیان ءَ کت۔ مراگش ءَ یو این ریزیڈنٹ کاآرڈینیٹر، اسلام آباد ءَ پوسٹیں جتا جتایں ملک آنی سفیر (ڈپلومیٹک کور)، پیسریگیں پاکستانی سفیر / درئی کارانی سیکرٹریز، یونائیٹڈ نیشن ءَ پاکستان ءِ گشتانکار منیر اکرم ءُ وزارت ءِ درئی کار ءِ اپسرگ آں بھر زوری کت۔ مراگشت ءَ سیکرٹری درئی کار سہیل محمود ءَ وش اتکی گشتانک دات ءُ یونائیٹڈ نیشن ءِ ارزشت ءُ پاکستان ءَ ھوار سرجمیں دگنیا ءِ جتا جتائیں ملک آنی استیں جیڈھ آنی ھوالگ ءَ یونائیٹڈ نیشن ءِ کرد ءِ بابت ءَ چمشانک دات۔ وزیر ءِ درئی کار مخدوم شاہ محمود قریشی ءَ مراگش ءَ گوں گشتانک دیان ءَ گوشت کہ مرچی 75 ھپتاد ءُ پنچمی سال پیسر، دومی ٹوھیں جنگ ءَ چہ پد ، آیوکیں باھند آناں چہ کشت ءُ ھون ءَ چہ رکھینگ ءِ واستہ ، بنیاتی بنی آدمی ھک آنی پد ءُ رندی ءُ دل یکیمی ءِ واستہ اے میاں اوستمانی یکوئی ءُ یک مشتی گل ءِ بنیات ایر کنگ بوت۔ آئی ءَ گوشت کہ مرچی یونائیٹڈ نیشن ءِ بنیاتی رھبند بیم ءُ ترس ءِ آماچ انت، یک نیمگی لیکہ ءُ زینو فوبیا وڑیں لیکہ سر چست کنگ ءَ انت۔ آئی ءَ گوشست کہ یونائیٹڈ نیشن ءِ چارٹر ءِ پد ءُ رند کنگ ءِ جزم ءِ درشان کنگی انت۔
