کوئٹہ۔ 23 اکتوبر (اے پی پی) وزیراعلیٰ بلوچستان جام کمال خان نا خصوصی است خواہی آن ضلع گوادر اٹی آبنوشی نا آسراتی تا فراوانی کن شنزانی ڈیم انا تعمیراتی کاریم ترندی اٹ برجاءِ۔ سرکاری حوالی نا رداٹ 500 ملین نا خڑچ آن ڈٹ آ پوسکن آ مالی سال اٹی شفاف وڑاٹ ٹینڈر مننگ آن پد ورک آرڈر جاری کننگانے۔ تعمیراتی فرم انا کنڈآن ڈٹ آ کاریم بناکرینے۔ حکومت بلوچستان نا کنڈآن سمارٹ سٹی گوادر نا برجا شونداری ڈٹ آتا پوروی و گوادر نا شاری تے بنداوی آسراتی آبنوشی نا ویل ءِ آخبتی بنداو تیا ایسر کننگ و آب رسانی نا نظام ءِ گچین کننگ کن کوشست آک برجاءُ۔ ڈپٹی کمشنر لسبیلہ نا دفتر آن جاری کروک نوٹیفکیشن نا رداٹ شنزائی ڈیم زہمی تیکن کمیٹی اس جوڑ کننگانے اسسٹنٹ کمشنر پسنی چیئرمین معاوضہ کمیٹی، ایگزیکٹو انجینئر ایریگیشن ڈیپارٹمنٹ ءِ سیکرٹری و سٹلمنٹ آفیسر مکران ڈویژن، ڈسٹرکٹ فاریسٹ آفیسر گوادر، ڈپٹی ڈائریکٹر ایگریکلچر گوادرو شنزائی ڈیم انا سائٹ نا زہمی تا نمائندہ ءِ کمیٹی باسک آتیٹی اوار کننگانے۔ کمیٹی نا کنڈآن زوت آن زوت سروے آن پد زہمی تا معاوضہ غاتیکن میکنزم اس جوڑ کننگک، داکان بیدس بلوچستان عوامی پارٹی نا ڈسٹرکٹ صدر میر یعقوب بزنجو و جنرل سیکرٹری نعمت اللہ ہوت گوادر نا شونداسری کن اہم ڈٹ آتا منظوری آ وزیراعلیٰ بلوچستان جام کمال نا منت واری ءِ ہرفسا پاریر کہ ساڑی حکومت نا دور اٹی ضلع گوادر اٹی شونداری و شونہالی کن پوسکن آ دور بناکرینے۔ ڈیم تا تفنگ آن ضلع گوادر نا بارانی علاقہ غاتیٹی آبنوشی نا ویل ایسر مننگ تون زہمی تا معاوضہ غاتیکن وخت آ گام گیج کرسا ساڑی حکومت الس نا است ءِ کٹانے و ضلع گوادر نا الس ساڑی حکومت نا کنڈآن بناکروک آ شونداری ڈٹ آتا پبی مخ تفی ءِ کیرہ۔
