این سی او سی کورونا مثبت کیس آتا کچ اٹ ودکی، ہسپتال آتیٹی ناجوڑ آتا داخل و مرک آتا کچ اٹی ودکی نا بارواٹی معلومدار کننگا

اسلام آباد۔ 23 اکتوبر (اے پی پی) نیشنل کمانڈ اینڈ آپریشن سینٹر (این سی او سی) نا دیوان اٹی کورونا مثبت کیس آتا کچ اٹ ودکی، ہسپتال آتیٹی ناجوڑ آتا داخل و مرک آتا کچ اٹی ودکی نا بارواٹی معلومدار کننگا۔ جمعہ نادے آ این سی او سی نا دیوان اٹی جان جوڑی نا چاہندار آک کورونا دین انا بابت ڈیٹا غا مبنی راستکی تے پیش کریر۔ فورم ءِ پاننگاکہ پدریسہ پنچ می دے کورونا نا مثبت کیس آتا کچ ودنگ ءِ۔ تدوک آ 4 دے تیٹی کم وود کورونا نا مثبت کیس آک 40 درسد زیات ءُ۔ مرک آتیٹی ہم ودکی مننگ ءِ۔ داہم ہُننگانے کہ مظفر آباد، حیدر آباد، کراچی و گلگت اٹی مچ آ ملک انا ایلو علاقہ غاتیانبار کورونا نا مثبت کیس آتا کچ ہم زیات ءِ۔ خاص وڑاٹ پنجاب اٹی ہسپتال آتیٹی کورونا ناجوڑ آتا داخلہ غاتیٹی ہم ودکی مننگ ءِ۔ ہسپتال آتیٹی نازرک حالیت آتیٹی داخل مروک آ ناجوڑ آتا کچ اٹی ہم ودکی مننگ ءِ۔ چیف سیکرٹری پنجاب پنجاب اٹی ودوک آ کورونا کیس آتا بابت فورم ءِ اپ ڈیٹ کرے۔ یکم ستمبر آ پنجاب اٹی مرک آتا کچ 1.6 درسد ئس و اینو دا 6 درسد ءِ۔ پنجاب اٹی کورونا نا مثبت کیس آتا کچ 0.92درسد آن 1.33 درسد اسکان ودانے۔ ہنداوڑاٹ پاکستان نا ساڑی حالیت آتیٹی کورونا کیس آتا کچ جہانی کہول آ 2.72درسد نا مقابلہ ٹی 2.06 درسد ءِ۔ کل مرک آتا 71 درسد نرینہ ءُ ہرافتے ٹی 76 درسد 50 سال آن زیات انا وئی ٹی ءُ۔ فورم دوشنبے نادے غٹ حالیت آتا اول سرآن جاچ ءِ ہلنگ آن پد پوسکن ءُ سلاہ و سوج پیش کیک۔