پی ٹی آئی بلوچستان نا جنرل سیکرٹری عبدالباری بڑیچ نا ’’اے پی پی‘‘ تون خصوصی گپ وتران
کوئٹہ۔ 23 اکتوبر (اے پی پی) پی ٹی آئی بلوچستان نا جنرل سیکرٹری عبدالباری بڑیچ پارینے کہ کشمیری الس بھلو وخت اسے آن بھارتی ظلم و جور اتون مون ترسا تینا حق خودارادیت کن پبی جہد کننگ ءُ، کشمیری تا جہد انشاء اللہ دے انا دے اس ضرور رنگ اتیک، وزیراعظم عمران خان تہیہ کرینے کہ کشمیری تے اوفتا حق خودارادیت ہر حال اٹ ترفنہ، و کشمیر نا ویل آ ہچ ءُ سمجھوتہ اس کننگپک۔ داخیال آتا درشانی ءِ او جمعہ نادے آ 27اکتوبر نا بابت ’’اے پی پی‘‘ تون خصوصی گپ وتران کرسا کرے۔ اوپارے کہ 27 اکتوبر آ مچ آ صوبہ ٹی کشمیری ایلم تتون یکجہتی نا درشانی ءِ کننگ کن دادے ءِ تہار دے انا وڑاٹ اڈتننگک، نن تینا کشمیری ایلم تا جہد آجوئی ٹی ہرگام آ اوفتے تون سلوک اُن۔ بلوچستان نا الس کشمیری ایلم، ایڑھ تے اوفتا جہد و قربانی تیا سلام پیش کینہ، وزیراعظم عمران خان کشمیر نا ویل ءِ جہانی فورم تیا ہرفسا دا پیدوار کرے کہ نن کشمیری ایلم تتون سلوک اُن، کشمیری تے ہچ ءُ حالیت اسے ٹی تنیا الیپنہ۔ عبدالباری بڑیچ پارے کہ وزیراعظم عمران خان قوم انا نمائندگی ءِ کرسا کشمیر نا مقدمہ ءِ پورو جیرت اٹ جہانی برادری نا مون آ تخانے، بھارت تینا ہٹ دھرمی تیان پاناد کے کشمیری تے اوفتا است خواہی نا رداٹ فیصلہ کننگ نا موقع ایتے۔ اوپارے کہ وزیراعظم عمران خان تینا تران اٹی پیدوار کرینے کہ او کشمیری تا نمائندگی ءِ اقوام متحدہ نا جنرل اسمبلی طرز آ برجاتخک و ہمووخت اسکان آرام اٹ تولپک تانکسان کشمیری تے اوفتا است خواہی نا رداٹ آجوئی ملیپک۔ اوپارے کہ جہانی برادری کشمیری تا دتر اٹ رنگی جہد ءِ مون آ تخسا بھارت ءِ بیوس کے کہ او کشمیری تے آجو کے۔
