اسلام آباد۔ 23 اکتوبر (اے پی پی) اسپیکر قومی اسمبلی اسد قیصر پارینے کہ ایوان نا تقدس نا خیال ءِ تخنگ حکومت و اپوزیشن ہڑتوم آتا زمواری ءِ، اپوزیشن ہرارویہ نا درشانی ءِ کرے داڑآن ایوان نا بے توقیری مریک۔ جمعہ نادے آ قومی اسمبلی ٹی سید نوید قمر نا کنڈآن ہرفوک آ ٹک انا ورندی ٹی اسپیکر پارے کہ ایوان نا تقدس نا خیال ءِ تخنگ حکومت و اپوزیشن ہڑتوم آتا زمواری ءِ۔ اوپارے کہ او اپوزیشن ءِ سلہ خلیک کہ اوفک اونا کنڈآ بریر و ہیت کننگے۔ اوپارے کہ قاعدہ نا خیال ءِ تخنگے۔ داوڑ نا حرکت آتیان ایوان نا بے توقیری مریک۔ داکان مست وزیراعظم نا سلاہکار پارلیمانی امور ڈاکٹر بابر اعوان سید نوید قمر نا اعتراضی ٹک انا ورندی ٹی پارے کہ ایوان حزب اقتدار و حزب اختلاف ہڑتوم آک اواری اٹ چلیفرہ۔ ایوان نا قاعدہ و ضابطہ و ایوان نا کسٹوڈین نا تکریم ننا غٹ انا بنداوی زمواری ءِ۔ تدوک آ دیوان اٹی اسپیکر نا چیئرءِ ہراوڑ گھیڑ کننگا ، ایجنڈا نا کاپی تے ہرسا خسنگا۔ ہمووخت آ دیوان نا صدر نشیں کن ساہ ہلنگ ہم محال مس دا حالیت آتے مچ آ دنیا خنانے و دااولیکو وار مون آ بسنے کہ سیٹی خلنگا و چیئرنا بے توقیری و گھیڑ کننگا۔ اوپارے کہ اسپیکر ہڑتوم آ کنڈآتا نمائندہ غاتے تینا چیمبر اٹی بٹنگسا ہیت وگپ کے تانکہ ایوان نا توقیر و قاعدہ و ضابطہ نا پین وخت اس خیال ءِ تخنگے۔ اوپارے کہ واک آؤٹ اپوزیشن نا حق ءِ ۔ اپوزیشن قومی سلامتی کمیٹی و بزنس ایڈوائزری کمیٹی نا دیوان تا ہم بائیکاٹ کرینے۔ اوخواست کرے کہ اسپیکر چیئرنا شرف ءِ کننگے۔
