اسلام آباد۔ 23 اکتوبر (اے پی پی) وزیراعظم نا خصوصی کمکار سیاسی ابلاغ شہباز گل تنقید کرے کہ مسلم لیگ (ن) و پی پی پی تون اوار حزب اختلاف نا جماعت آک بیرہ نواز شریف نا احتساب نا باندات آتیا ریلیف ہلنگ کن ریاستی ادارہ و حکومت ءِ بلیک میل کننگ نا کوشست کننگ ءُ ولے سندھ اٹی اوفتا صریح دروغ ءِ پاش کننگا۔ جمعہ نادے آ نجی ٹی وی چینل تون گپ وتران اٹی اوپارے کہ اپوزیشن نا مرکزی ایجنڈا ریاستی ادارہ غاتیا زور شاغنگ ءِ ولے حکومت پورو وڑاٹ ادارہ غاتون سلوک ءِ و ادارہ غاتا وقار ءِ نسخان تننگ کن حزب اختلاف نا داوڑنا کوشست آتے سگنگ پننگک۔ اوپارے کہ حکومت و ریاستی ادارہ غاتے بلیک میل کننگ نا کوشست آتے پین سگنگ پننگک و احتساب نا عمل اٹ اڑاند ودی کروک آتے مایوسی تون مون تروئی تمک۔ شہباز گل پارے کہ ملکی تاریخ اوفتا کسہ غاتیان پُر مسنے ہراڑے مسلم لیگ (ن) نا کماشی ٹی پنجاب حکومت پولیس ءِ کانود نا خلاف ورزی کننگ کن کاریم اٹ ایسونے و صفدر اعوان نا دزگیری نا بابت فوٹیج آن صاف ظاہر مریک کہ نئے تو درگہ اسے زبردستی ملنگاسس و نئے اوٹی چک و تاڑ اوار ءِ۔ اوپارے کہ اپوزیشن نا پسندیدہ میڈیا چینل تا کمک اٹ اسہ ویڈیو اس ہم گردش کننگانے ہراٹی غلط تصویر کشی کننگانے ولے ہوٹل نا تہہ آن سسی سی ٹی وی فوٹیج اٹ پیدوار وڑاٹ نشان تننگانے کہ پولیس مچ آ کاریم ءِ سرتسنے۔ اوپارے کہ عارضی عظیم الشان اتحاد سلہہ بند فوج و عدلیہ نا برخلاف ہیت کننگ ءِ و دانا مسخت ملک اٹ بے چیٹی تالان کننگ نا ءِ۔ شہباز گل پارے کہ اپوزیشن سیوت نا ہچ ءُ آخبت اس اف۔ شہباز گل پارے کہ مسلم لیگ (ن) نا راہشون مریم نواز نا خلیس آن حکومت سندھ بنجائی حکومت نا برخلاف بے بنداو مہم اس چلیفینے و حکومت سندھ مدام غٹ ویل آتا زموار بنجائی حکومت آ دوبہ خلسا تینا نابودی ءِ ڈکنگ نا کوشست کرینے۔ اوپارے کہ کرپٹ اپوزیشن تدوک آ 30 سال اٹی الس کن گڑاس کننگ اٹ بے سہب مسوسس و داسہ او بیرہ تینا غم ءِ بشخنگ و تینا کرپٹ سرکڑدہ غاتا رکھ اکن جمع مسنے۔
