اسلام آباد۔ 23 اکتوبر (اے پی پی) وزیراعظم نا سلاہکار خزانہ و محصولات ڈاکٹر عبدالحفیظ شیخ پارینے کہ جہانی بینک پاکستان نا متکن آ شونداری شریدار ءِ، کورونا نا دین انا زہم آتے کم کننگ کن پاکستان نا گام گیج آتا جہانی کہول آ ستاءِ کننگانے۔ اوداہیت ءِ جہانی بینک انا منیجنگ ڈائریکٹر ایگزل وان ٹروٹسن برگ و جہانی بینک انا نائب صدر ہرت ونگ شیفر تون ورچوئل دیوان اٹی پارے۔ دا دیوان آئی ایم ایف و جہانی بینک انا سالانہ دیوان نا وخت آ اڈ ہلک۔ بنجائی وزیر اقتصادی امور مخدوم خسروبختیار، وزیراعظم نا خصوصی کمکار ندیم بابر و گورنر اسٹیٹ بینک رضاباقر ئسک ہم دیوان اٹی آن لائن بشخ ہلکر۔ وزیراعظم نا سلاہکار ڈاکٹر عبدالحفیظ شیخ کوویڈ۔ 19 نا گچین وڑاٹ مقابلہ ءِ کننگ کن پاکستان ءِ المی مالی کمک نا فراوانی آ جہانی بینک انا کڑد انا ستاءِ کرے۔ و پارے کہ جہانی بینک پاکستان نا مریس معیاد شریدار ءِ۔ اودیوان نا بشخ ہلوک آتے ملک انا ساڑی اقتصادی حالیت و پائیدار شونداری کن حکومت نا اصلاحات نا پروگرام نا چیدہ چیدہ ٹک آتیان معلومدار کرے۔ اوپارے کہ پاکستان نا حکومت تینا خڑچ آتا مون ءِ توننگ کن اسہ گچین ءُ پالیسی اس تینا کرینے۔ دا پالیسی نا رداٹ تہہ نا ذریعہ اٹ کٹیا تیٹی ودکی کننگ انگ ءِ، اوپارے کہ دا گام گیج آتا سوب آن کورونا آن مست کٹیا یکجا کننگ اٹ 17 درسد ودکی ریکارڈ کننگا۔ مارچ 2020ء ٹی پرائمری بیلنس سرپلس ئس، ہرااسہ بھلو سرسہبی اس ئس ولے بدبختی اٹ دین اقتصادی سرسہبی تے نسخان تس۔ اوپارے کہ پاکستان نا حکومت مشکل وخت اٹ تینا اسہ کروڑ 16 لکھ آن زیات خاہوت آتے نغد امداد فراوان کرے، دین انا دے تیٹی احساس پروگرام ناکمک اٹ شفاف و گچین وڑاٹ امداد نا فراوانی نا جہانی کہول آ ستاءِ کننگا۔ ہنداوڑ حکومت سبسڈیز و پے رول اسکیم نا رداٹ کاروبار خاص کر چنکا و نیامئی درجہ نا کاروبار ءِ آسراتی فراوان کرے۔ وزیراعظم نا خصوصی کمکار پٹرولیم ندیم بابر بشخ ہلوک آتے توانائی نا بشخ اٹی کروک آ گام گیج آتیان معلومدار کرے۔ اوپارے کہ توانائی نا نظام اٹ شفافیت و اودے گچین کننگ کن متکن آ پاور پلانٹ آتے بدل کننگ انگ ءِ۔ اوپارے کہ ملک اٹی گیگ بدل توانائی نا مون آ دننگ کن ہم گام گیج آتا چرجوئی برجاءِ۔ جہانی بینک انا ٹیم حکومت نا اصلاحات آتا ایجنڈانا ستاءِ کرے و کوویڈ۔ 19 تون مون تننگ کن انٹرنیشنل ڈویلپمنٹ ایسوسی ایشن نا کمک اٹ پاکستان نا کمکاری ءِ برجاتخنگ نا عزم انا درشانی ءِ کرے۔
