اسلام آباد۔ 23 اکتوبر (اے پی پی) بنجائی وزیر حوالکاری و شینکاری سینیٹر شبلی فراز پارینے کہ عدالت ءِ درکار مجرم نواز شریف ءِ برطانیہ غان پدی اتنگ کن کانودی و سفارتی ذریعہ ءِ کاریم اٹ اتنگ انگ ءِ، 15 جنوری 2021ء اسکان محمد نواز شریف کوٹ لکھپت یا پین جیل اسے ٹی مریک، کرپشن زدہ اپوزیشن نا اصل جاگہ زندان ءِ، سندھ واقعہ اسہ ڈرامہ اسے، حقیقت اٹ ن لیگ و پیپلزپارٹی اسہ ایلو تون گیم کننگ ءُ، کیپٹن صفدر نا دزگیری نا ویڈیو فوٹیج سندھ حکومت و مسلم لیگ ن نا بھاز انگا دعویٰ و دروغ تیا دیر شاغار، درگہ نا پرغنگ، چک و تاڑ یا زوراکی جاگہ اس ہم نظر بتو، اوفتا سیاست چٹا، مسلم لیگ ن بشخنگ انگ ءِ، ریٹائرڈ کیپٹن محمد صفدر نا دزگیری سندھ حکومت و پولیس نا باندات ءِ، پیپلزپارٹی نا کڑد ءِ چانہ، 18 می ترمیم نا مسخت ہم پیدوار مسنے کہ دا بنجاءِ نزور کننگ خوائسرہ، پیپلزپارٹی و مسلم لیگ ن نا سیاست دروغ، منافقت و ریاکاری آ مبنی ءِ، مریم نواز نا دروشم آ اینو فریشانی و بوکھلاہٹ نا آثارنمان ئس۔ او جمعہ نا دے آ پی آئی ڈی ٹی پریس کانفرنس آن تران کریکہ۔ بنجائی وزیر حوالکاری و شینکاری سینیٹر شبلی فراز پارے کہ میڈیا چینل تیا کراچی ٹی ریٹائڑڈ کیپٹن صفدر نا دزگیری نا سی سی ٹی وی فوٹیج نشر مس۔ دا فوٹیج اٹی اونا دعویٰ نا رداٹ پنوک آ درگہ ءِ نشان تننگتو، فوٹیج نا رداٹ ریٹائرڈ کیپٹن صفدر است جم پولیس نا حراست اٹی ئس، مریم صفدر نا حواریک چندی وار چادر و چار دیوالی نا رکھ انا ذکر ءِ کریر، دامخلوق گیرام کرے کہ اوفک تینا دور اٹی ماڈل ٹاؤن واقعہ ٹی زالبول آتون انت سلوک کریر؟ دامخلوق نا کنڈآن گودی بے نظیر بھٹو نا کڑدار کشی آن غٹ بلد ءُ، کراچی واقعہ نا بابت مریم نواز و سندھ حکومت نا بیان آک متضاد ءُ، اوفتا متضاد بیان تیان لگک کہ بلاول شاید اوفتیان تینا لمہ نا بیر ءِ ہلک۔ اوپارے کہ مریم صفدر، نواز شریف و ایلوفتا بابت سپریم کورٹ نا فیصلہ ساڑی ءِ، دامخلوق پدریسہ دروغ تڑرہ، اوفتا سیاست دروغ و ریاکاری آ مبنی ءِ، دامخلوق کرپشن نا چاہندار ءُ، اوپارے کہ قومی دولت آ ڈاکہ خلکر، وونٹ ءِ شرف ایتبو نا دعویٰ کروک آک تینا دور اٹی نوٹ ءِ شرف تسر، دامخلوق اصل واقعہ غان چکار ءِ اسہ کنڈ کننگ کن دروغ انا سیبوءِ ہلیرہ۔ دامخلوق نا کنڈآن قائد نا مزار نا بے حرمتی نا ذکر انت اکن متو؟ اوپارے کہ شاہی خاہوت تینے کانود آن ایڑتر تکک، مریم نواز و نواز شریف نا تاحیات ترجمان ہم پاش آن پاش دروغ انا ماہر ءِ ، دامخلوق ہندن ءُ دروغ تڑرہ کہ سچ ہم شرمنگک، دامخلوق نا ناٹک تینا جاگہ غا حکومت زرگزران ءِ پین سوگو کننگ آ تینا چکار ءِ کرینے ہنداخاطرآن پاکستان اٹی ایکسپورٹ ودنگ ءِ، پاکستان نا زررادہ کننگ ریکارڈ کہول آٹے، اولیکو وار کرنٹ اکاؤنٹ پلس اٹ بسنے۔ تعمیرات نا بشخ شونداری نا کنڈآہِننگ ءِ، سیمنٹ، گاڈی، موٹرسائیکل آتا ریکارڈ بہاء مننگ ءِ۔ اوپارے کہ پردیسیک عمران خان نا کماشی آ پورو پت کننگ ءُ و ہر بروک آ دے ترسیلات اٹی مثبت ودکی دانا شاہدی اسے۔ اوپارے کہ ن لیگ و پیپلزپارٹی والا تا سیاست چٹانے اوفتا ٹھکانہ زندان ءِ انتئے کہ کرپشن کروک آک ہچ ءُ حالیت اسے ٹی بچنگ کپسہ دا وزیراعظم عمران خان نا قوم اتون قولءِ۔ اوپارے کہ کیپٹن (ر) صفدر اعوان نا دزگیری تون بنجا نا ہچ ءُ تعلقداری اس اف۔ سندھ پولیس اودے دزگیر کرے و دا باندات اٹی سندھ حکومت ہرجاگہ غا جوابدہ ءِ۔ اسہ سوج اسے نا ورندی ٹی او پارے کہ اسحاق ڈار کرپشن و ڈالر ءِ مصںوعی کیپ اس بیرفنگ نا چاہندار ءِ، اسحاق ڈار نا سوب آن جہانی کہول آ پاکستان ءِ خفت اتون مون تروئی تما۔ اسہ سوج اسے نا ورندی ٹی اوپارے کہ مستین بھلا سیاسی جماعت آک ہرافک حکومت کرینو اوفتا میرات آک پیشن نا ملک آتیٹی ءُ ہنداخاطرآن او مخلوق برطانیہ، امریکہ تون اوار ایلو ملک آتون دوبہ دار آتا ہڷ و تس انا معاہدہ کتوس۔ اوپارے کہ محمد نواز شریف ءِ وطن آ پدی اتنگ کن غٹ ذریعہ غاتے کاریم اٹ اتنگ انگ ءِ، 15 جنوری اسکان نواز شریف پاکستان نا تہہ ٹی کوٹ لکھپت یا پین زندان اسے ٹی مریک۔
