کوئٹہ۔ 23 اکتوبر (اے پی پی) صدر مملکت ڈاکٹر عارف علوی پارینے کہ پاکستان اٹی کورونا دین انا دُوارہ تالانی نا حالیت آک گڑتی نا سوب افس ولے حددرجہ احتیاط کننگ نا گرج ءِ،فرانس تون اوار بھاز انگا ملک آتیٹی حالیت آک اسہ وار ولدا تشویشناک مننگ ءُ۔ داخیال آتا درشانی ءِ او کوئٹہ گورنر ہاؤس اٹی گورنر بلوچستان جسٹس ریٹائرڈ امان اللہ یاسین زئی تون گپ وتران کرسا کرے۔ داوخت آ بنجائی وزیر منسٹری آف نیشنل فوڈ سیکورٹی اینڈ ریسرچ فخرامام، صوبائی وزیر میر سلیم خان کھوسہ نور محمد دمڑ چیف سیکرٹری بلوچستان کیپٹن ریٹائرڈ فضیل اصغر سیکرٹری کشت وکشار قمبر دشتی ئسک ہم ساڑی ئسر۔ گورنر بلوچستان صدر ءِ پارے کہ مچ آصوبہ ٹی ایس او پی تا رداٹ جامعہ غاتیٹی خوان و خوانفنگ نا عمل نا بناءِ کننگانے۔ چیف سیکرٹری بلوچستان صدر مملکت عارف علوی ءِ پارے کہ بلوچستان اٹی داوخت آ کورونا دین انا 1 ٹک چار آن ٹک پنچ درسد اسکان ءِ، داوخت آ پنچ سد طالب علم آتیٹی کورونا پازیٹو خننگانے ولے الحمداللہ غٹ طالب علم آک ریکور مننگ ءُ، صوبہ ٹی داوخت آ کورونا دین اٹی پانزدہ ضلع انگیج ءُ و پازیٹو کیس آتا ساڑی آ کچ 213ءِ۔ صدر مملکت ڈاکٹر عارف علوی بلوچستان اٹی کورونا دین انا توننگ کن حکومت نا کنڈآن چست کروک گام گیج آتیا است جمی نا درشانی ءِ کرسا پارے کہ بحیثیت زموار قوم انا ننے رکھی گام گیج آتا عمل کروئی ءِ و کورونا دین انا توننگ کن تینا اجتماعی و انفرادی کڑد ءِ ادا کروئی ءِ۔
