کشمیری ورناتا مندوب اقوام متحدہ ٹی سفارتکار آتے بھارتی بیدادی و بربریت آن معلومدار کرے

نیویارک۔ 22 اکتوبر (اے پی پی) اقوام متحدہ ٹی، کشمیری ورناتا مندوب سفارتکار آتے بھارت نا غیر کانودی کوزہ گیری کشمیر اٹی بھارتی بیدادی و بربریت آن معلومدار کرے۔ داٹی سفارتکار آک براہ راست بھارتی کوزہ گیری ٹی کشمیر نا ورناک مندوب آن متنازعہ ریاست اٹی ’’وحشیانہ ‘‘ کوزہ ٹی رہینگوک آ کشمیری تا سنگین و ناگفتہ بہ حالیت نا بارواٹ بِنگر۔ امریکہ ٹی تعلیم دوئی کروک اسہ کشمیری، ورناعلی زیاد دنیا نا غٹ ڈیہہ تا نمائندہ غاتے پارے کہ کشمیری ورناک و چناتے بھارتی ظلم و بربریت نا مون تروک ءِ۔ کشمیری ورنا علی زیاد اقوام متحدہ نا جنرل اسمبلی نا راجی، دودوربیدہ ئی و انسانی ہمدردی نا باندات آتا بابت مسٹ میکو کمیٹی ٹی اڈ ہلوک یواین یوتھ نا نمائندہ غاتیکن اسہ غیر رسمی شرہ ٹی بشخ ہلک۔ یورپی یونین نا ڈل انا کنڈآن، دا شرہ نا مسخت ورناتے مسٹ میکو کمیٹی نا کاریم اٹ ان پٹ فراوان کننگ نا موقع فراوان کننگ ئس۔ داشرہ ٹی ہر ترانکار ءِ بیرہ مسہ منٹ اسکان ہیت کروئی ئس۔ شرہ نا بناءِ کرسا، جنرل اسمبلی نا صدر، وولکان بوزکیر ورنانمائندہ غاتیا زور شاغا کہ او اسہ گچین ءُ دنیا سے نا تعمیر اٹ تینا کڑد ءِ اداکیر۔ دا نما وخت ءِ۔ دا نما جنرل اسمبلی ءِ۔ بوزکیر پارے کہ نن یکجا مرسا اقوام متحدہ اس ٹہیفنگ کینہ ہرانا آخبت اٹ ننے گرج ءِ۔ علی زیاد تینا ریمارکس اٹی پارے کہ اینو مچ آ دنیا نا تاریخ اٹی ورناتا غٹ آن بھلا چین ساڑی ءِ ولے دافتیان 25درسد براہ راست یا بالواسطہ بیدادی و سلہہ بند جھیڑہ غاتیان زہمی ءُ۔ اوپارے کہ ای ہم ہندن ءُ پس منظر اسے آن بسونٹ۔ جموں و کشمیر نا ورناتا نمائندہ نا حیثیت اٹ کنا تینا علاقہ تدوک آ ہفتہ دہائی آن بھارتی غیر کانودی کوزہ ٹی ءِ۔ زیاد پارے کہ بھارت مکروفریب و درو اٹ کاریم ہلسا جموں و کشمیر نا الس نا حق خودارادیت آن نمن ءِ۔ داکان پد او تدوک آ سال 5 اگست نا بھارتی غیر کانودی و اسہ کنڈی کارروائی تا کنڈآ چکار کرفے وخت اس کہ بھارتی غیر کانودی گام گیج آن پد آن کشمیری الس آ بیدادی ودسا ہنا۔ کشمیری ورناتا نمائندہ پارے کہ تدوک آ چانڑدہ تُو اٹی بھارت غیر کانودی وڑاٹ 13000 کشمیری ورناتے دزگیر کرے، دافتیان چندی تے بیدادی نا شست کرے، ورنامارتے باضابطہ مقدمہ چلیفنگ آن بیدس پاہو تننگا، پرامن مچی کروک آتا برخلاف پیلٹ گن ءِ کاریم اٹ اتنگا و ہند آتے دڑفسا و مچ آ محلہ ءِ ہشسا اجتماعی سزا تننگا۔ اوپارے کہ ساڑی ٹی بھارتی بربریت ہمووخت آ مون آ بس ہراتم بھارت اسہ جعلی مقابلہ سے ٹی 3 ورناتے کسفے، ہرافتیان اسٹ نا وئی بیرہ 18 سال ئس۔ بھارتی فوج بنائی وڑاٹ دا ہرمسٹ آ بندغ آتے ’’دہشت گرد‘‘ گونداسس ولے اوکان پد 33 سال اٹی اولیکو وار، جعلی مقابلہ نا اعتراف کرے۔ علی زیاد پارے کہ داوڑ بیرہ جہانی میڈیا و سول سوسائٹی نا کنڈآن چھان بین اٹی ودکی نا سوب آن ممکن مس۔ علی زیاد مستی پارے کہ داخہ ظلم آن پد ہم اینو اسکان اسہ بھارتی فوجی اسے نا برخلاف کانودی کارروائی کننگتنے۔ کشمیری ورناتا توار نا حیثیت اٹ، اوجہانی برادری آن مون آ بننگ و تینا کڑد ءِ ادا کننگ نا خواست کرے۔ کشمیری ورناتا مندوب پارے کہ بھارتی حکومت نا دا من مانی کارروائی تے توننگ وآبادکاری نوآبادیاتی پالیسی تے توننگ کن میکنزم اس جوڑ کننگے ہرا کشمیری تیٹی پین سیاسی، زرگزرانی و علاقائی پسماندگی ودی کننگ ءِ۔