کوویڈ۔ 19 نا ارٹ میکو لہر ملک ءِ پلویڑ اٹ ہلنگ کیک، نوشین حامد

اسلام آباد۔ 22 اکتوبر (اے پی پی) پارلیمانی سیکرٹری، نیشنل ہیلتھ سروسز ریگولیشنز اینڈ کوآرڈینیشن نوشین حامد الس ءِ معلومدار کرینے کہ کوویڈ۔ 19 نا ارٹ میکو لہر ملک ءِ پلویڑ اٹ ہلنگ کیک انتئے کہ موسم یخ مننگ ءِ و ملک اٹی پوسکن آ کیس آتیٹی پدریسہ ودکی مننگ ءِ۔ پنچ شنبے نادے آ نجی ٹی وی چینل تون گپ وتران کرسا اوباوری کرفے کہ اونا وزارت کورونا دین انا ارٹ میکو لہر اتون مون تننگ کن تیار ءِ۔ اوقوم ءِ ماسک بیننگ و یخ انا موسم اٹ تالان مروک آ دین آن بچنگ کن السی ہند آتیا بے گرج ہلننگ آن پاناد کننگ نا مشورہ ترسا پارینے کہ یخ انا موسم نا بنانا سوب آن کورونا دین انا ارٹ میکو لہر نا گڑتی ءِ۔ اوپارے کہ ارٹ میکو لہر اولیکو نا مقابلہ ٹی ہلوک پک مننگ کیک۔ اوخبڑدار کرے کہ اگہ مخلوق حکومتی رکھی گام گیج آتا خلاف ورزی ءِ بند کتو تو انفیکشن نا مون ءِ توننگ کن سخت گام گیج کننگک۔ نوشین حامد پارے کہ تدوک آ منہ ہفتہ ٹی مچ ا ملک اٹی کوویڈ۔ 19 نا مثبت شرح 2 درسد آن گدرینگانے و نیشنل کمانڈ اینڈ آپریشن سینٹر (این سی او سی) دا حالیت آتیا سخت نظر تخانے۔ اوپارے کہ اگہ ایس او پی تا عمل اٹ ہچ ءُ جوانی اس نظر بفک تو، این سی او سی تون سخت گام گیج کننگ نا کنڈآ پدی بننگ آن بیدس ہچ ءُ چارہ اس سلپک۔ پارلیمانی سیکرٹری پارے کہ پاکستان کورونا دین انا اولیکو لہر انا مون ءِ توننگ اٹ سرسہب مس ولے شادی ہال، و السی ہند آتا دُوارہ ملنگ آن پد نن مخلوق نا مچی ءِ خنان کہ او میدان انگا جاگہ غاتیا بننگ ءُ ہرا ملک اٹی ودوک آ کیس آتا بھلا سوب ءِ و ہرانا سوب نن کوویڈ۔ 19 نا ارٹ میکو ریسہ نا کنڈآ ہِننگ اُن۔ اوپارے کہ ہرا مخلوق ساہ انا ناجوڑی یا پین ناجوڑی اسے ٹی اختہ ءُ اوفک سختی اٹ رکھی گام گیج آتیا عمل کیر۔