حکومت روزگار نا فراوانی و بے بریبری نا چٹفنگ کن سنبرینگوک ءِ، سلاہکار خزانہ و محصولات

اسلام آباد۔ 22 اکتوبر (اے پی پی) وزیراعظم نا سلاہکار خزانہ و محصولات ڈاکٹر عبدالحفیظ شیخ پارینے کہ حکومت روزگار نا فراوانی و بے بریبری نا چٹفنگ کن سنبرینگوک ءِ، کورونا دین انا دور اٹی حکومت زرگزرانی اڑاند و مشکل آتیان پد ہم الس و کاروبار ءِ کمک فراوان کننگ نا حکمت عملی اس تینا کرے۔ اوداہیت ءِ چارشنبے نادے آ آئی ایم ایف نا منیجنگ ڈائریکٹر کرسٹالینا جوار جیوا نا ڈیہہ نا وزیر و گورنر اسٹیٹ بینکس اتون گپ وتران نا وخت آ ویڈیو نا کمک اٹ تران کرسا پارے۔ دے ٹک نیامی، قطبی افریقہ، اوغانستان و پاکستان نا ڈیہہ نا وزیر و گورنر اسٹیٹ بینکس دا ہیت وگپ اٹی بشخ ہلکر۔ دیوان اٹی ڈیہہ نا زرگزران تیا کورونا دین انا زہم و داتنکی تون مون تننگ کن تینا کروک آ آزموندہ و پالیسی و راہشون اصول آتیا گپ وتران کننگا۔ وزیراعظم نا سلاہکار پارے کہ دین ملک انا زرگزران نا گچینی کن حکومت نا کنڈآن چست کروک گام گیج و حاصلات آتے گہنا تسنے۔ اوپارے کہ دُن تو پاکستان نا حکومت ءِ مالیاتی اڑاند آتا مون تروک ئس اوکان پد ہم دین آن پد حکومت تینا الس و کاروبار ءِ ممکنہ کمک و کمکاری نا فراوانی نا حکومت عملی ءِ تینا کرے۔ راج انا نیزگار و نزور تپہ غاتے نغد امداد فراوان کننگا وخت اس کہ کاروبار خاص کر چنکا و درمیانہ درجہ نا کاروبار ءِ کمک فراوان کننگا۔ اوپارے کہ حکومت ملک اٹی روزگار نا فراوانی و بے بریبری نا چٹفنگ اٹ سنبرینگوک ءِ ، اگہ حکومت اصلاحات نا پروگرام ءِ برجاتخک تو دا حالیت اٹ نیزگار آتیا خڑچ کننگ کن فنڈ آتا بست و بند و شونداری خڑچ آتے معقول کننگ نا اِرا چیلنج مون تروک مریک۔ نیزگاری نا لکیر آ یا اونا شیف زند تیر کروک تپہ غاتیکن زیات خڑچ آتا بست و بند کن زیات وام ہلوئی تمک انتئے کہ زرگزرانی ودکی ٹی کمتی نا دور اٹی خراج آتیٹی ودکی کننگ ممکن اف۔ ڈاکٹر عبدالحفیظ شیخ پارے کہ شونداری کن ڈیہہ نا شریدار ملک آتون اواری اٹ مربوط حکمت عملی اس تینا کننگ نا گرج ءِ۔ اوپارے کہ دا حالیت آتیٹی سنگت ملک و شونداری شریدار آتون تیکنیکی سلابت و مالی کمک نا دوئی کننگ المی سمجھنگک و ہندارداٹ غٹ تینا کڑد ءِ ادا کیر۔ داوخت آ بشخ ہلوک آک شرہ نا بست وبند کننگ آ کرسٹالینا جورجیواو اونا ٹیم انا منت واری ءِ ہرفیر و کثیر الجہتی شونداری شریدار نا حیثیت اٹ زیات گچین کڑد ادا کننگ نا گرج ءِ مون آ تخا۔ بشخ ہلوک آک داہیت آ امنا کریر کہ دین جان جوڑی نا خڑچ و چندی ویل آتا تکنیکی ایسری آ زیات چکار کننگ نا گرج ءِ تالان کرینو۔ دینی مرض انا اولیکو لہر آن پد غٹ ملک آک تینا جی ڈی پی نا نمان بشخ آن ہنانو و بے روزگاری غٹ آن بھلا چیلنج نا حیثیت اٹ مون آ بسنے۔ بشخ ہلوک آک داہیت آ امنا کریر کہ اگہ رکھی گام گیج آتے معمول نا بشخ جوڑ کننگتو تو ارٹ میکو لہر آن نسخان آک زیات مننگ کیرہ۔ بشخ ہلوک آک پڑک 20 ملک آتا کنڈآن پدتموک ملک آتیکن وام تا معطلی نا گام گیج نا ستاءِ کریر و پاریر کہ نزور زرگزران تے پین مالی اعانت فراوان کننگ نا گرج ءِ۔