مسکوہی حکمران تا روپئی ءِ اوور ویلیو تخنگ نا بھرم ءِ اینو مچ آ قوم کُننگ ءِ، ہمایوں اختر

لاہور۔ 22 اکتوبر (اے پی پی) پاکستان تحریک انصاف نا سینئر مرکزی راہشون و مسکوہی بنجائی وزیر ہمایوں اختر خان پارینے کہ مسلم لیگ (ن) والاک ادارہ غاتا مخالفت ءِ ہم کیرہ و ضرورت تمنگ نا وخت آ اوفتیا ہم سرمریرہ، داپاننگ سہی اف کہ زرگزرانی سرجز آتے تورسا کرنٹ اکاؤنٹ نسخان ءِ کم کرینے، جہانی ادارہ امنا کننگ ءِ کہ پاکستان کورونا دین اٹی انسانی جان تتون اوار تینا زرگزران ءِ ہم منفی زہم تیان بچفینے۔ داخیال آتا درشانی ءِ او داڑے تینا دفتراٹی اوڑدہی کن بروک آ پارٹی راہشون و صنعت آتا ڈل اتون گپ وتران کرسا کرے۔ ہمایوں اختر خان پارے کہ ہراتم نم آئی ایم ایف آن گڑاس خوارے تو اونا سٹینڈرڈ فارمولہ ءِ کہ غٹ آن مست کرنسی ہرادے اوور ویلیو تخنگانے اوتے تینا جاگہ غا اتبو۔ مسکوہی حکمرانک روپئی ءِ اوورویلیو تخنگ کن ہرا ’’تجربہ کاری‘‘ نشان تسوسر اونا بھرم ءِ اینو مچ آ قوم کننگ ءِ۔ داڑآن درآمدات کُبین مریک و کبینی ودک۔ اوپارے کہ اسٹیٹ بینک انا کنڈآن شرح سود ءِ شیف اتنگانے ہراڑآن مینو فیکچرنگ سیکٹر نا گروتھ مریک ہراڑآن زرگزران ءِ شون و روزگار نا وارخواہی ودی مریک۔ ہمایوں اختر خان پارے کہ نواز شریف نا اصولی موقف دادے کہ اونا خواہش نا رداٹ پاک فوج ہرا اسٹ انگا سوگو قومی ادارہ ءِ او پنجاب پولیس و آئی ایس اسپیشل برانچ جوڑ مرے و اونا تابعدار آفیسر آک داادارہ غاتے چلیفر۔ نواز شریف نا امیر المومنین مننگ نا شوق بھاز متکن ءِ، داادارہ غاتا مخالفت ءِ ہم کیک و ضرورت تمنگ نا وخت آ ادارہ غاتیا ہم سرمریک۔