اسلام آباد۔ 22 اکتوبر (اے پی پی) بنجائی حکومت وزیراعلیٰ سندھ مراد علی شاہ نا کنڈآن اسہ بنجائی وزیر اسے نا کمک اٹ حکومت ءِ چٹفنگ نا دھڑکو نا دوبہ نا مذمت ءِ کرسا اونا سختی اٹ تردید ءِ کرینے۔ بنجائی وزیر حوالکاری و شینکاری سینیٹر شبلی فراز و وزیراعظم نا سلاہکار احتساب و داخلہ شہزاد اکبر اسیجائی پریس کانفرنس اٹی پاریر کہ سجفوک ءُ چم اسے نا رداٹ سندھ اٹی اسہ گوازی اس کننگ انگ ءِ ہرانا براہ راست فائدہ ننا دشمن ملک ہندوستان ءِ ملنگ ءِ، اگہ آئی جی سندھ انا برمتہ مسنے تو داتم اسکان تعزیرات پاکستان نا رداٹ قابل جرم دفعہ نا مقدمہ انت اکن درج متنے، سندھ پولیس نا ٹویٹ نا رداٹ ضابطہ نا رداٹ مقدمہ درج و دزگیری مسنے، پاننگے کہ سندھ پولیس اسہ ضمانت نا قابل جرم اسے ٹی صفدر اعوان نا دزگیری ءِ انت اکن المی سمجھیتو، داہم دروغ پاننگاکہ بلاول وزیراعظم تون مفننگ آ آرمی چیف اتون رابطہ کرے، ننے غٹ ءِ سما ءِ کہ نم کمرہ نا تہہ ٹی انت کیرےو کمرہ غان پیش تمسا امر جمہوریت نا چیمپیئن جوڑ مریرے، سیاسی ٹھگ آتا جماعت (ن) لیگ والاک تینا دورتیٹی ماڈل ٹاؤن نا کودک زالبول آ سم کاری کریر، بے نظیر نا عکس آتے ہیلی کیپٹر آن خسار، (ن) لیگ داوڑنا حرکت آتا خالق ءِ، دا مخلوق تینا زرس جند انا فائدہ، کرپشن نا مقدمہ و جان جوڑی نا پن آ نروک آ تینا لیڈر ءِ بچفنگ کن جمہوریت و پاکستان ءِ نزور کننگ خوارہ، دروغ تڑآتا آئی جی و سیاسی ٹھگ اسٹیج آ سلسا پاکستان نا الس نا دتر ءِ پوشنگ، ادارہ غاتے بھس کننگ، ادارہ غاتا ٹکراؤنا بے سہب کوشست آتیا الس آن بشخنداری خوار۔ نواز شریف، الطاف حسین پارٹ ٹو نا کڑد ءِ ادا کننگ ءُ۔ چنکو سیاسی مسخت اسے کن ملک ءِ بدنام کپس۔ بنجائی وزیر حوالکاری و شینکاری سینیٹر شبلی فراز پارے کہ وزیراعلیٰ سندھ مراد علی شاہ سندھ اسمبلی ٹی سلسا ساف دروغ تڑے انتئے کہ داتو اونا روایت ءِ۔ دروغ و ریاکاری اونا سیاست نا اولیکو تمبہ ءِ۔ اوپارے کہ وزیراعلیٰ سندھ انا کنڈآن اسہ بنجائی وزیر اسے آ دوبہ خلک کہ دھڑکو تننگا کہ ایف آئی آردرج کرفتو تو حکومت سندھ سلپک۔ نن دا دروغ دوبہ نا مذمت و سختی اٹ تردید ءِ کینہ، اگہ وزیراعلیٰ سندھ سچ پاننگ خواہک تو او بنجائی وزیر نا پن ءِ ہم پاریکہ اصل اٹ دا ذہنی وڑاٹ ہبکئی نا گواچی مسنے، جلسہ غاتا ریسپانس ءِ خنسا او مخلوق دروغ انا سیبو ءِ ہلنگ نا بناءِ کرینو۔ سندھ حکومت نا نابودی و کرپشن ءِ ہچ ءُ حالیت اسے ٹی ڈکھنک مفک۔ اوپارے کہ قائد نا مزار آ ہلٹر بازی و ہرا غیر کانودی واقعہ مس اوٹی صفدر و مریم اعوان ہراڈرامہ ءِ کریر او بانی پاکستان نا مزار آ طوفان بدتمیزی بدترین درور ءِ۔ دا جرم ءِ ڈکھنگ کن پوسکن ءُ ناٹک اس کننگا، مون آ بروک آ ویڈیو فوٹیج اٹ صفدر اعوان پولیس نا گاڈی ٹی تولنگ آن مست اسہ اِرا نعرہ ہم خلک۔ زوراکی یاچک و تاڑ متو۔ فرض کینہ کہ چک و تاڑ ہم مسنے تو سندھ انا دنگ اٹ بریک۔ اوپارے کہ داوڑنا حرکت و باندات آتا سوب آن پیپلزپارٹی قومی پارٹی آن علاقائی پارٹی اس جوڑ مسنے۔ اوپارے کہ پاکستان نا زرگزران گچین وڑاٹ چلینگ انگ ءِ، کورونا نا دین انا چیلنج آن پد ہم وزیراعظم عمران خان نا کماشی ٹی ننا زرگزران دُوارہ تینا نت تیا سلیسونے، اِراخاہوت نا کوزہ گیری ءِ شکست ترسا عمران خان ہندن ءُ حکومت اسے نا بنداو ءِ شاغا ہرانئے کاروباری ءِ و نئے خاہوتی رابطہ غاتیا مبنی ءِ۔ اوپارے کہ سیاسی ٹھگ آتا ن پڑک اِرا ہیت انا ذکر کرے ہرافتے ٹی چادر و چار دیوالی نا رکھ انا ہیت ءِ کننگا۔ انت چادر و چاردیوالی بیرہ مریم صفدر کن ءِ۔ ماڈل ٹاؤن نا زالبول آتیا سم کاری، بے نظیر نا عکس آتے ہیلی کیپٹر آن خسنگ تون اوار داوڑنا ہر حرکت نا خالق تو (ن) لیگ تو تینٹ ءِ۔ داک ہنداخس تمانو کہ ہچ کس ءِ الیپسہ۔ اوپارے کہ کورونا دین انا چیلنج اتون مون تننگ کن مچ آ دنیا کوشست کننگ ءِ لکھ آ بندغ آتا نوکریک ہنانو، کاروبار چٹانے ولے الحمد اللہ پاکستان اٹی دا شدت نا نسخان رسینگتو، نم خوارے کہ پاکستان نا زرگزران سہی مف، ہڑدڑمرے، مقدمہ، دُزی و لٹ وپل ، کانود ءِ درکار بندغ آتے بچفنگے۔ اوپارے کہ اومیت ءِ کہ نمے عقل بریک، الس نا مون ا سچ پارے۔ وزیراعظم نا سلاہکار احتساب و داخلہ بیرسٹر شہزاد اکبر پارے کہ دروغ تڑآتا آئی جی سندھ اسمبلی و پریس کانفرنس اٹی کراچی واقعہ غا ہم دروغ تڑیر۔ اوپارے کہ منہ دے مست قائد نا مزار آ ہلڑ بازی مس، اسہ ماحول اس جوڑ کننگا، پی ٹی آئی نا کارندہ غاک ایف آئی آر نا درج کننگ کن درخواست تسر۔
