اسلام آباد۔ 22 اکتوبر (اے پی پی) وزیراعظم عمران خان نا کماشی ٹی قومی رابطہ کمیٹی ہاؤسنگ، تعمیرات و ڈویلپمنٹ نا ہفتہ وار دیوان پنچ شنبے نادے آ اڈ ہلک ۔ دیوان اٹی گورنر اسٹیٹ بینک نیزگار و نیامی تپہ کن آسان قسط آتیا وام تا فراوانی نا بابت حوال تس، نیشنل بینک، الائیڈ بینک، میزان بینک، بین الحبیب، حبیب بینک و بینک آف پنجاب نا سروک آک وزیراعظم ءِ پوسکن آ پاکستان ہاؤسنگ پروگرام نا رداٹ وام تا فراوانی نا بارواٹی معلومدار کریر۔ دیوان ءِ پاننگاکہ وام تا ہلنگ نا عمل ءِ آسان جوڑ کننگانے و دارداٹ برانچ آتیٹی جتا ڈیسک جوڑ کننگانے۔ پرائیویٹ بینکس، اسلامی و روایتی بینکاری ہڑتوم آتا رداٹ وام فراوان کینہ۔ بینک آتا سروک آک حکومت ءِ تعمیرات سیکٹر نا مون آ دننگ و نیزگار تپہ ءِ تینا اُرا جوڑ کننگ نا آسراتی تننگ آ پورو کمکاری نا باوری کرفیر۔ اووزیراعظم و حکومتی زرگزرانی ٹیم ءِ کورونا دین انا رداٹ کاروباری تپہ بشمول بینک آتیکن کروک آ گام گیج آتیا خراج تحسین پیش کریر۔ دیوان ءِ معلومدار کننگاکہ وام تا فراوانی نا عمل ءِ کم مدتی جوڑ کننگ کن ٹیکنالوجی ءِ کاریم اٹ اتنگ انگ ءِ تانکہ وام ہلوک آ بندغ آتا کوائف ءِ زوت پک کننگ مرے۔ وزیراعظم تاکید کرے کہ نیزگار بندغ آتے بینک آتیان وام ہلنگ اٹی ہروڑنا آسانی فراوان کننگے و خاص وڑاٹ اوفتا عزت نفس انا خیال ءِ تخنگے۔ چیف سیکرٹری پنجاب دیوان ءِ پارے کہ تعمیرات و بلڈرز کن آن لائن پورٹل اسے نا بناءِ کننگانے ہراڑآ داتم اسکان 6994 درخواست رسینگانے و دافتیان 54 درسد نا منظوری ءِ تننگانے۔ دیوان ءِ معلومدار کننگا تعلقدار ادارہ غاتے ہم آن لائن پورٹل نا کمک اٹ منسلک کننگانے تانکہ منظوری نا عمل اٹ تاخیر مف۔ ہر منظوری نا عمل ءِ وکت انا پابند کننگانے و درخواست تروک آ تینا کیس انا بارواٹی موبائل ایپ انا کمک اٹ معلومدار مریک۔ وزیراعظم پارے کہ غٹ صوبہ غاک آن لائن پورٹل ءِ پبی کاریم اٹ اتیر تانکہ منظوری نا عمل ءِ پورو وڑاٹ شفاف و زوت ممکن کننگے۔
