اسلام آباد۔22اکتوبر (اے پی پی):پاکستان ءَ مکن کتگ ءُ گوشتگ کہ اگاں بھارت ءَ گلگت بلتستان یا آزات جموں کمشیر ءَ کجام ھم دست مانجنی کت ڈا ایشرا سرجمیں رنگ ءَ پسو کنگ بیت، پاکستان مقبوضہ کشمیر ءَ بھارتی ظلم آنی ھلاپ ءَ گوانک ءَ مدام چست کنت، اوگانستان ءَ ایمنی ءُ برجائی سرجمیں پڑ ءِ واستہ سیت ایگ انت، ترجمان درئی کارانی کارگس ءَ پنچ شمبے ءِ روچ ءَ ھمک ھپتگی بریفنگ ءِ ساھت ءَ گوشت کہ بھارتی سروک آناں پاکستانی راج ءِ جزم ءُ ازم ءُ مئے سلاھ بندیں ارد آنی کزبی بلدکاری ءُ جنگی تیاری آناں ڈلگچار کنگ نہ لوٹ ایت۔ آئی ءَ گوشت کہ سرجمیں راج بھارت ءِ کجام ھم نہ وشیں مول ءُ مراد آنی ھلاپ ءَ یک مشت انت۔ آئی ءَ گوشت کہ بھارت ءَ را جنوبی ایشیا ءَ مھکمیں ایمنی ءُ برجائی ءِ واستہ ھمساھگیں ملک آنی گوما کشمیر ءِ جیڈھ ءَ ھوار توامیں جیڈح آناں ایمنی ءَ گوں گیوار کنگ لوٹ ایت۔ ترجمان ءَ بھار ت ءَ سوشل میڈیا ءَ پاکستان ءِ بابت ءَ بدنیتی آنی رد ءَ وت جوڑ کتگیں ھال ءُ پروپیگنڈا کنگ ءِ ھوالگ ءَ نوٹس زوران ءَ گوشت بی جے پی ۔ آر ایس ایس حکومت ءِ اشارہ ءَ چہ پاکستان ءِ ھلاپ ءَ بھارتی میڈیا ءِ اے رنگیں کوشست سِلیں زھنیت ءِ آدینک ءَ پیش دار انت۔ ترجمان ءَ گوشت کہ بھارت پاکستان ءِ ھلاپ ءَ بے سر ءُ پادیں پروپیگینڈا گامگیج ءُ پرزی کسو آں چہ مقبوضہ جموں کشمیر ءَ بنی آدم آنی لگت مالی ءُ کشمیری آناں گور جوڑ کنگ ءَ ھوار ایندگر گیر کانودی گامگی آنی ھوالگ ءَ میاں اوستمانی دلگوشی ءَ را دور کت نہ کنت۔ ترجمان ءَ گوشت کہ مقبوضہ کشمیر ءَ 444 روچ ءَ چہ چپ ءُ چاگرد برجا انت وھدیکہ گوستگیں ماہ ءَ بھارتی زوراکیں فورسز آں 18 بے کسوریں مردم آناں شہید کتگ۔ آئی ءَ گوشت کہ پاکستان مقبوضہ کشمیر ءَ کودکیں بنی آدم آنی لگت مالی ءَ را سہرا کنت انت۔ ترجمان ءَ گوشت کہ بھارت ءَ 800 ملین ءَ چہ گیش مردم گریبی ءِ لکیر ءَ چہ جھل زندمان ءَ گوازینگ ءَ انت، بھارت ءَ را وتی بیم ناکیں جزم آنی پد ءُ رند کنگ ءِ مٹ ءَ ملکی چاگردی ءُ گہبودی گہتری ءِ سر ءَ دلگوشی دیگ لوٹ ایت۔
