اسلام آباد۔ 21 اکتوبر (اے پی پی) پارلیمانی امور نا وزیر مملکت علی محمد خان پارینے کہ جہانی برادری مقبوضہ کشمیر اٹی انسانی حق انا لتاڑتیا چُپ سلپ، انتئے کہ ساڑی آ نازرک وخت اٹی دا باندات آ چپ سلنگ ڈیوالئی آنبار ءِ۔ چارشنبے نادے آ ریڈیو پاکستان نا کرنٹ افیئر نا پروگرام اٹی گپ وتران کرسا اوپارے کہ بھارت بھلا اقتصادی واکدار ءِ و بھاز انگا ملک آک اوڑتون زرگزرانی تعلقداری جوڑ کرینو و ہندا سوب آن ہمو ملک آک مقبوضہ کشمیر اٹی بھارتی سفاکی آ چُپ ءُ۔ اوپارے کہ وزیراعظم عمران خان و وزیر خارجہ شاہ محمود قریشی کشمیر نا ویل ءِ دنیا نا ہر فورم آ گچین وڑاٹ تالان کننگ ءُ، و تدوک آ سال اقوام متحدہ نا جنرل اسمبلی ٹی وزیراعظم نا تران آن مچ آ دنیا نا چکار کشمیر نا کنڈآ مس۔ علی محمد خان پارے کہ ننے پاکستان ءِ زرگزرانی واک اس جوڑ کروئی مریک تانکہ دنیا پاکستان نا خواست ءِ بیوس مننگ کے۔ اوپارے کہ بدبختی اٹ اسلامی کمکار تنظیم (او آئی سی) کشمیر و فلسطین تون اوار امت مسلمہ نا دیرینہ ویل آتا ایسر کننگ کن تینا کڑدءِ ادا کپننگ ءِ۔ اوپارے کہ ساڑی دور اٹی وزیراعظم عمران خان، مہاتیر محمد و طیب اردگان مسلم دنیا نا سرکڑدہ مرسا مون آ بسنو۔ او جودھ پور اٹی 11 بندغ نا کسفنگ نا واقعہ نا بابت پارے کہ زہمی خاہوت نا مردو سروک نا مسڑ شریمتی مکھی ہرا اولیکو معلوماتی رپورٹ ءِ درج کرفے اوٹی آر ایس ایس ءِ پندار کننگاسس۔ دُن تو نن دا باندات ءِ سفارتی چینل آتا کمک اٹ بھارت نا مون آ ہرفین ولے اوکان پد ہم بھارتی کمامدارآک پاکستان ءِ ایف آئی آر و بنائی جاست وپاستی رپورٹ نا کاپی تننگ کن کمک کتو۔
