کراچی۔ 21 اکتوبر (اے پی پی) کراچی نا علاقہ گلشن اقبال اٹی مسکان چورنگی ٹی واقع کثیر منزلہ ہنکینی ماڑی ٹی زور دار دھماکہ ٹی 4 بندغ زوال و 14 ٹھپی مسر۔ ترجمان کراچی پولیس شازیہ جہاں چارشنبے نادے آ ’’اے پی پی‘‘ تون گپ وتران کرسا دادے پک کرے۔ اومستی پارے کہ عباسی شہید ہسپتال کراچی ٹی کل 3 لاش و 5 ٹھپی تے اتنگانے وخت اس کہ دھماکہ ٹی اسہ لاش و 6 ٹھپی تے پٹیل ہسپتال آ اتنگا۔ اومستی پارے کہ ریسکیو اینڈ میڈیکل سروسز(ایس آر ایم ایس) اسہ بیان اسے ٹی پارینے کہ او گلشن اقبال اٹی مسکان چورنگی نا واقعہ نا جاگہ غا دُوانزدہ منٹ اٹی تینا ایمبولینس آتے سرکریسس۔ اومستی پارے کہ ایس آر ایم ایس نا پنچ گاڈی دا جاگہ غا پیرامیڈیکس و المی طبی گڑا و دوائی تتون سلوک ءُ۔ سندھ انا وزیر تعلیم سعید غنی موقع غا سرمس و ہموڑے ساڑی انتظامیہ ءِ کمکی کاریم تے ترند کننگ نا پارت کرے۔ اوکان پد میڈیا تون گپ وتران کرسا اوپارے کہ دھماکہ ٹی ٹھپی مروک آ بندغ آتے بچفنگ و اوفتے ہسپتال آ شفٹ کننگ اولیت ءِ۔ صوبائی وزیر پارے کہ دھماکہ نانوعیت نا ڈس و نشان ءِ خلنگ کن دا واقعہ نا جاست و پاست ءِ کننگ انگ ءِ۔
