اسلام آباد۔20اکتوبر (اے پی پی): دری کارانی وزیر مخدوم شاہ محمود قریشی ءَ سے شمبے ءِ ر وچءَ آذربائیجان ءِ دری کارانی وزیر جے ہون بائرموف ءَ گوں ٹیلیفون ءِ سرءَ گپ ءُتران کتگ۔ دوئیں راہشوناں دونیمگی سیادی، آذربائیجان ءُ آرمینیا ءِ نیام ءَ جنگءُ جدل ءَ ہوار دونیمگی دلگوشی کارانی سرءَ ھیال ءُ لیکہ ءِ درشانی کنگ بوتگ۔ دوئیں دری کارانی وزیر آں بیپاری، وانگءُ زانگ ءُ دود ءُ ربیدگ ءَ ہوار ایندگہ بازیں پڑآں دونیمگی کمک ءَرا گیش کنگ ءِ سرءَ تپاک کتگ۔ شاہ محمود قریشی ءَ گشتگ کہ پاکستان ءَ را ” نگورنو کاراباخ” ءَ امنءُ ایمنی ءِ ناگیگیں جاورھال ءِ سرءَ تکانسری اَست۔ آرمینیا ءِ نیمگ ءَ چہ آذربائیجان ءِ کوچگی دمگاں بمب گواری ءَ را ایر جتگ۔ پاکستان اے گرانیں وہدءَ گوں آذربائیجان ءُ اُلس ءَ گوں ہم کوپگ اِنت۔ دری کارانی وزیر ءَ گشتگ کہ ما نگور نوکاراباخ ءِ ہوالگ ءَ آذربائیجان ءِ لیکہ ءَ را من اَں۔ آزری دری کارانی وزیر ءَ انوگیں جیڑہ ءَ پاکستان ءِ نیمگ ءَ سرجمیں ہمرداری کنگ ءَ دری کارانی وزیر ءِ شکرءُ منت گپتگ۔ دری کارانی وزیر ءَ گشتگ کہ آذربائیجان ءِ نیمگءَ چہ او آئی سی نزیکی گروہ ءَ ہوار، میاں اوستمانی فورم ءِ سرءَ گوں کشمیری آں ہمرہ داری کنگ لکھ ستاہ کرزایت۔ دوئیں دری کارانی وزیر ءَ پاکستان ءُ آذ ربائیجان ءِ نیام ءَ دونیمگی سیادی ءِ سرءِ سدکی ءِ درشانی کتگ۔ دری کارانی وزیر مخدوم شاہ محمود قریشی ءَ آذربائیجان ءِ دری کارانی وزیر ءَ پاکستان ءِ ترءُتاب کنگ ءِ دعوت داتگ کہ آئی گوں منت وار ءَ قبول کتگ۔
