نیویارک۔ 20 اکتوبر (اے پی پی) پاکستان بھارت نا کشمیری تا حق خودارادیت نا دوئی کننگ نا جہد ءِ دہشت گردی گوندنگ نا بیانیہ ءِ مسترد کرسا پارینے کہ غیر کانودی بھارتی مقبوضہ کشمیر اٹی کشمیری الس حق خودارادیت نا دوئی کننگ کن تینا جہد نا بناءِ کرینو و بھارت نا حق خودارادیت تفننگ آ کشمیریک بھلو کچ اسے آ مزاحمت کننگ ءُ۔ 1947ء ٹی جموں و کشمیر ءِ بھارتی نوآبادی جوڑ کننگ آن ہلیس داتم اسکان بھارت تینا غیر کانودی کوزہ ءِ برقرار تخنگ نا کوشست اٹی چندی چم آتے کاریم اٹ ایسونے۔ داہیت ءِ پاکستانی مندوب بلال محمود چوہدری اقوام متحدہ نا جنرل اسمبلی نا سیاسی و نوآبادیات نا چٹفنگ نا فورتھ خصوصی کمیٹی ءِ پارے۔ اوبھارتی نمائندہ نا کنڈآن مقبوضہ کشمیر نا بھارت نا بشخ مننگ نا دعویٰ نا ورندی ءِ تننگ نا تینا حق ءِ کاریم اٹ اتسا اقوام متحدہ مشن اٹ پاکستان نا قونصلر پارے کہ غیر کانودی بھارتی مقبوضہ جموں و کشمیر اٹی بھارتی حکومت نا برخلاف بھلو کچ اسے آ مزاحمت مننگ ءِ۔ کشمیری الس اقوام متحدہ نا کنڈآن تروک آ تینا حق خودارادیت نا دوئی کننگ نا پکا عزم کرینو پاکستانی مندوب پارے کہ مظلوم کشمیریک بھارت نا کنڈآن بھلو کچ اسے آ ظلم و زیاتی و بیدادی تیان پد ہم بھلو کچ اسے آ مزاحمت کننگ ءُ اوبھارت نا کنڈآن نوآبادیاتی علاقہ نا ڈیموگرافی ءِ بدل کننگ نا بھارتی کوشست نا حوالہ ءِ ترسا پارے کہ بھارت داسہ جموں و کشمیر نا ہنکینی الس نا دودوربیدہ ئی پہچان ءِ چٹفسا اوفتا ڈغار تیا کوزہ کننگ خواہک۔ اوپارے کہ بھارت نا داوڑنا فریب کاریک بے سہب مریرہ۔ پاکستانی مندوب مستی پارے کہ پاکستان بھارتی بربریت ءِ پاش کننگ و جہانی برادری ءِ بھارتی ظلم و بربریت آن معلومدار کننگ نا چرجوئی ءِ برجاتخک۔ اوپارے کہ مقبوضہ کشمیر نا جھیڑہ نا ساف ایسری آن بیدس اقوام متحدہ نا نوآبادیات نا چٹفنگ نا ایجنڈا پورو مفک۔
