اسلام آباد۔ 20 اکتوبر (اے پی پی) وزیراعظم نا خصوصی کمکار قومی جان جوڑی ڈاکٹر فیصل سلطان پارینے کہ غذائی کاختی نا باندات آ وزیراعظم نا چکار ءِ، حکومت صوبہ غاتون اواری اٹ غذائی کاختی نا مون ءِ توننگ کن قومی نیشنل ایکشن پلان اس جوڑ کننگ ءِ۔ سے شنبے نادے آ قومی غذائی سروے رپورٹ 2018ء نا جاری کننگ کن اڈ ہلوک آ دود آن تران کرسا اوپارے کہ غذائی کاختی نا باندات آ وزیراعظم نا چکار ءِ، دا سروے مستین نا مقابلہ ٹی بھاز زیات آب اٹی ءِ۔ دا سروے ءِ ترتیب تننگ اٹ ڈاکٹر ثانیہ نشتر نا اہم ءُ کڑد اس مسنے۔ سروے نا مسخت دا بشخ اٹی گچین اصلاحات اتنگ نا ءِ۔ غذائی کاختی نا ویل گڑاس ضلع غاتیٹی بھاز زیات ءِ۔ اوپارے کہ غیر مناسب و متوازن خور انا باندات گڑتی نا سوب ءِ۔ پنچ اکتوبر آ وزیراعظم نا کماشی ٹی دا ویل آ دیوان اس مس، وزیراعظم دا ویل ءِ ایسر کننگ نا پارت کرینے۔ اوپارے کہ دارداٹ ایڈوائزری کمیٹی جوڑ مسنے، داسہ بروک آ سی سی آئی دیوان اٹی دا باندات ءِ دینہ، حکومت دا ویل انا ایسری کن دادے احساس پروگرام اٹ اوار کرینے۔ دا رداٹ پروگرام ہم ترتیب تننگانے۔ خصوصی کمکار پارے کہ پروگرام نا پی سی ون ءِ تیار کننگانے ہرا صوبہ غاتا سلابت اٹ تیار کننگانے۔ پنچ سالہ پروگرام آ مسہ نیم سد ارب روپئی نا کساس خلنگانے۔ اوپارے کہ حکومت غذائی کاختی نا مون ءِ توننگ کن سوگو و گچین گام گیج آتے پک کننگ ءِ۔ ڈاکٹر فیصل سلطان پارے کہ حکومت صوبہ غاتون اواری اٹ غذائی کاختی نا مون ءِ توننگ کن قومی نیشنل ایکشن پلان اس جوڑ کننگ ءِ۔ مچ آ ملک آن 1 لکھ 15 ہزار اُرا نیشنل نیوٹریشن سروے نا بشخ ئسر۔ اوپارے کہ نیشنل نیوٹریشن سروے ٹی اولیکو وار ضلعی کہول آ حساب وکتاب جمع کننگا۔
